Lima ka buwang masuso namatay pagkabangga sa ilang motor

CEBU, Philippines — Patay ang usa ka batang lalakeng lima pa lang sa buwan sa nahitabong digrasya sa National Road sa Barangay Kalunasan, Lungsod sa Calape, Probinsiya sa Bohol, alas 7 sa buntag sa adlaw’ng Huwebes.

Duha ka motorsiklo ug usa ka tricycle ang nalambigit sa nahitabong disgrasya. Sa imbestigasyon sa Calape Municipal Police Station ang Honda Click nga motorsiklo sa mag-live in partner ang sakay niini gikan sa Lungsod sa Inabanga ug paingon sa Tagbilaran City.

Ang 21-anyos nga inahan ang nagmaneho sa motorsiko ug angkas niya iyahang kaipon nga maoy nagkarga sa ilang lima ka buwan nga anak.

Base sa nakita sa kapulisan sa nahitaboan ang motorsiklo sa pamilya giingong nikawat sa pikas lane ug gituohan nga mao kadto ang hinungdan nga nakasugat niini ang Suzuki Smash sa pikas lane nga paingon sa Lungsod sa Tubigon.

Gumikan sa kakusog sa panagbangga naangol ang mag live-in partner apil ang ilahang lima ka buwan nga anak.  Ang bata gidala pa sa Calape Mother and Child Hospital apan gideklarar kining dead-on-arrival.

Ang managkapuyo gibalhin sa tambalanan sa Tagbilaran City ug sa pagkutlo ning maong balita wala pa maulii sa panimuot ang babaye samtang nakaangkon og mga bali sa kabukogan ang iyahang kaipon.

Ang gikaengkwentro nila nga motorsiklo naangol sab ang driver apan wala ra nagrabehan.

Nasayran ang mag live-in partner taga Tagbilaran City ug niadto sa Lungsod sa Inabanga kay gikuha nila ilahang anak nga gibilin sa ilang amahan.  Padulong na unta sila mouli dihang nahitabo ang disgrasya.

Sa pagkakaron giuna sa pamilya ang pagpatambal sa mga biktima ug wala pa sila’y plano labot sa hitabo. --  IBM BANAT NEWS