220 ka iring ug iro ang nakabenipisyo sa libreng kapon ug bakuna
CEBU, Philippines — Niabot sa 220 ka iro ug iring ang nakadawat sa libreng serbisyo gikan sa City Veterinary Office sa Dakbayan sa Talisay niadtong Martes.
Kini subay sa kasaulogan sa Provincial Rabies Consciousness Month.
Si Mayor Gerald Anthony “Samsam” Gullas, Jr. nagkanayon nga tinguha nila mao ang pagpagpalambo sa kaalam sa publiko kalabot sa epekto sa rabies ug ang paagi nga kini malikayan.Ang rabies sa iro ug iring makapeligro sa katawhan kong dili kini seryoso nga atimanon.
Ang mga mahiligon sa mananap ang nidala sa ilang mga binuhi aron makalibre sa serbisyo diin 126 ka iring ug iro ang nakabenipisyo sa libreng sa spaying o neutering ug 94 ang nakabenipisyo usab sa libreng rabies vaccination.
Naobserbahan ni Gullas nga menos ang gidaghanon nga nipahimulos sa serbisyo tungod kay ang uban nga mahiligon sa mananap maghuwat na lang kini sa Aksyon Agad sa Barangay diin aduna usab didto ang serbisyo alang sa ilang mga binuhi.
Nanghinaot si Gullas nga ang katawhan nga mahiligon sa mananap makamao usab sa ilang responsibilidad nga dili makahasol sa ubang tawo sa palibot. (BANAT NEWS)
- Latest
