Mga panimay sa estero de parian giguba na

CEBU, Philippines —  Dili mominos sa unom ka panimalay gikan sa napulo nga gitukod sa tunga sa sapa sa Estero de Parian sa Barangay San Roque ang hingpit na nga giguba sa kagamhanan sa dakbayan sa Sugbo.

Kini human miuyon na ang mga residente nga mobalhin tungod kay nahimutang sa peligro ang ilang pagpuyo sa higayon nga masinate ang pagbaha.

Usa sa mga residente nga si Liza Javier, nitug-an nga modawat na sila sa relocation site nga gihatag kanila diha sa nangkaville Barangay Quiot ug nanghinaut sila nga mahatagan og gamay nga ayuda aron duna silay magamit sa pagpatukod sa ilang balay.

Sumala pa ni Javier, malaumon usab sila nga adunay makargahan sa ilang mga gamit alang na unya sa paghinay-hinay na nila ug tukod sa ilang mga panimalay.

Ang officer in charge sa Prevention Restoration Order Beautification Enhancement (PROBE) nga si Aderson Comar, nitug-an nga nagsugod na sila pagpangguba sa mga panimalay human miuyon ang mga residente nga mopahawa na sa maong dapit.

Dugang pa ni Comar, karong semanaha gipaabot nga mahuman ang ilang clearing operations.

Si Konsehal Jerry Guardo, Chairman sa Committee on Infrastructure sa siyudad nibutyag nga ang gihimong clearing operation subay sa kamanduan ni Mayor Michael Rama nagpakita nga seryoso gayud sila sa pagsulbad sa problema sa baha. Ang mga residente gihatagan og options nga mahimo nilang mapahimuslan sama sa balik probinsya program, financial assistance ug permanent housing apan mas daghan ang nipili sa ilang bag-o nga puy-anan.

Si Guardo nitug-an nga dunay dili mominos 60 ka individuals ang gipahimutang sa barangay hall ug gihatagan sila og pipila ka adlaw nga mopuyo sa maong dapit hangtud nga matukod na ang ilang mga panimalay.—  MEL (BANATNEWS)