Kabomberohan gibansay sa pag-rescue og wild animals

CEBU, Philippines — Aron malikayan ang disgrasya ug uban pang bati nga hitabo gipaubos sa Wildlife Management Training ang kabomberohan sa siyudad sa Sugbo kun unsaon ang saktong pamaagi sa pag-rescue og wild animals.

Ang mga personnel sa Department of Environment and Natural Resources (DENR) Region Seven ang nag-train sa mga bombero diin dunay lecture nga gihimo sa wala pa ang demonstration diha sa Pari-an Fire Sub-Station.

Matud ni Senior Fire Officer 2 Wendell Villanueva nga dili lang pagresponde og sunog ang trabaho sa kabomberohan apan mo-responde sab sila og alarma sama sa pag-rescue og bitin nga kung dili makabuhi sa cage madala sa baha.

Gani pila na ka higayon nga naka-rescue og bitin ang Cebu City Fire Office ug ilaha dayon kining itugyan sa DENR.

Nunot niini, nakita sa director sa Cebu City Fire Office nga si Superintendent Reynaldo Enoc ang panginahanglan nga masayod ang iyang mga tawo sa saktong pag-rescue sa wild life maong nakig-alayon sila sa DENR aron maedukar ang kabomberohan.

 Sayod man kita nga for the past weeks grabe kay ang uwan, tungod sa uwan grabe ang baha unya posible tungod sa baha nanggawas ang mga bitin mao na og wala ko masayop more than five na nga insidente nga nakadakop og bitin ang atong kabomberohan  suma pa ni SFO2 Villanueva.

Ang Cebu City Fire Office dunay napulo ka Fire Sub-Station ug kada Sub-Station nagpadala og duha ka representante alang sa maong Wildlife Management Training.

Giklaro hinoon ni SFO2 Villanueva ang mga nakaapil sa maong training mopaambit sa ilang mga kaubanang bombero aron mahibawo sab sila sa angayang buhaton.

 Matag station og dunay panghitabo nga ingon within their AOR kami nay moresponde, manawag dayon ta sa DENR ug sa Cebu City Government para ma facilitate ang pag-rescue ug paghipos sa wildlife , ni Villanueva pa. — Rowena D. Capistrano (BANAT NEWS)