Upat ka lungsod sa Camotes midawat og subsidy sa Kapitolyo

CEBU, Philippines — Moabot sa P10 milyones ang nadawat nga subsidy sa upat ka mga lungsod sa Camotes Island.

Ang maong kantidad alang kini sa preparasyon sa mga LGUs sa pag-apil sa ilang mga contingents sa umaabot nga 2023 Pasigarbo sa Sugbo karong Agosto 27, 2023 diha sa siyudad sa Carcar.

Ang lungsod sa San Francisco, Poro, Tudela ug Pilar nakadawat og P2.5 million nga subsidy matag usa gikan sa Kapitolyo.

Mismo si Gobernador Gwendolyn Garcia maoy niturn-over sa maong subsidiya ngadto kang Mayor Alfredo Arquillano sa San Francisco, Mayor Edgar Rama sa Poro ug Mayor Greman Solante sa Tudela atol sa caravan of services sa Probinsya didto sa lungsod sa San Francisco.

Si Mayor Manuel Santiago usab ang nidawat sa subsidy sa Kapitolyo atol sa caravan of services sa Probinsya didto sa Pilar niadtong Agosto 18.  Una nang nagkanayon si Garcia nga mas dako dako ang subsidy nga madawat sa mga lungsod nga anaa sa mga isla sanglit mas layo man kini ug kinahanglan pa motabok sa mainland.

Ang mga island LGUs nakadawat og tag P2.5 million samtang ang mga mainland nga contingents nakadawat og tag P2 million nga subsidy sa Kapitolyo alang sa Pasigarbo. —/MEL (BANAT NEWS)