High-powered firearms nasakmit

CEBU, Philippines —  Nasakmit sa kapolisan ang nagkalain-laing high powered nga mga armas gikan sa usa sa mga gipanagiyang negosyo ni Henry Pryde Teves, igsuon ni Kongresista Arnulfo “Arnie” Teves kagahapon.

Ang mga sakop sa Criminal Investigation and Detection Group (CIDG) pinasikad sa search warrant mironda sa sugar mill nga HDJ Agriventures Corporation nga nahimutang sa HDJ Tolong Compound, Sitio Sicopong, Barangay Caranoche, Lungsod sa Sta. Catalina, Negros Oriental.

Sigon ni Police Colonel Thomas Valmonte, Chief Legal Division sa CIDG nga niadtong Huwebes gi-issue sa usa mga executive Judge sa Dakbayan sa Mandaue ang search warrant batok sa illegal possession of firearms.

Sa pagkutlo ning maong balita dili momenus sa napulo ka mga nagkalain-laing klase sa armas ang nasakmit sa kapulisan diin tulo ang long firearms.

“Meron na po kaming nakita na mga firearms actually ‘yung iba mga medyo I don’t know if it is a like weapon or what we call that high- powered pero mahahaba kasi they call it rifles. As of now siguro not less than 10 including the pistols,” sigon ni Valmonte.  Gawas sa mg armas duna say mga bala sa nagkalain-laing mga armas ang nakompiskar sama sa .9mm, .45 ug 5.56, 7.62 calibers ug mga bala sa shotgun.

Wala’y mga lisensiya matod pa ang maong mga armas nga nasakmit.

“Mga bahay po base on informants ito ‘yung tinataguan ng mga inuutusan,” ni Valmonte pa.

Lakip sab sa gisusi sa CIDG abg tugkaran sa compound kay sigon ni Valmonte nga giingong dunay gipanglubong nga mga armas didto.
Gibutyag sab sa opisyal nga tulo ka tawo ang ilang nadakpan apan wala didto ang subject sa warrant nga si Henry Pryde Teves.

Niadtong Marso 10, 2023, gironda sab sa CIDG ug PNP Special Action Force (SAF) ang lima ka mga balay ni Rep. Teves pinasikad gihapon sa search warrant nga gi-issue sa usa ka judge sa Mandaue City.
Tulo ka balay ni Teves sa Bayawan City ug duha ka balay sa Lungsod sa Basay ang gi-ronda sa mga operatiba ug nakuha ang nagkalain-laing mga armas og explosives.

Giklaro hinuon ni Valmonte nga wala’y kalabutan ang maong raid sa nahitabong masaker sa Pamplona, Negros Oriental nga gikamatay ni Gob. Roel Degamo ug walo ka mga tawo. Ang operasyon matud pa kabahin sa flagship program sa CIDG nga Oplan Paglalansag o kampanya batok illegal ug loose firearms. (BANAT NEWS)