Mayor Degamo: Kami maoy biktima dinhi

CEBU, Philippines — Ang biyuda sa gipatay nga gobernador sa Negros Oriental nasagmuyo sa gipagawas nga pamahayag sa usa ka magbabalaod sa ilang probinsya nga nag-ingong biktima sab sila sa maong hitabo.

Si Pamplona Mayor Janice Degamo, asawa sa gipatay nga si anhing gobernador Roel Degamo, nasagmuyo sa pangangkon ni Negros Oriental Rep. Arnulfo “Arnie” Teves nga nangangkong biktima usab kini sa maong krimen.

Ang gobernador gipatay kauban sa laing walo ka mga tawo diha sa sud sa ilang tugkaran sa lungsod sa Pamplona samtang ang gobernador nanghatag og ayuda sa iyang mga konstituwente.

Ang biyuda sa gobernador nipadayag nga sila maoy namatyan ug adunay mga naangol mao nga sila maoy tinuoray nga biktima ug dili ang pangangkon sa pipila ka mga tawo, nga wala direktang mihingalan kang Teves.

Di Teves mi-post og video diha sa social media bahin sa pangangkon niining biktima sab sila sa maong krimen.

Matud pa sa mayor, mas maayo nga paabuton nalang ang mga otoridad  nga makapresentar og mga ebidensya batok sa mga suspetsado ug utok sa maong krimen.

Ang mayor niawhag karon sa Senado nga hatagan og pagtagad ang ilang kaso. Giawhag niya nga dunay himuong senate hearing ug senate investigation gawas sa nagpadayon karon nga imbestigasyon sa taskforce Degamo ug sa DOJ.

Malaumon ang mayor nga makabaton gayud dili lang sila apan ang tanan nga mga biktima ug hustisya ug manubag gayud ang tanang nalambigit niini.

Sa nilabay nga adlaw si Teves nipagawas og video ug nipadayag nga dili kini mouli tungod sa ka risgo sa iyang kinabuhi.

Matud niya biktima siya sa maong panghitabo human adunay mga tawo nga gusto gayud siyang ilambigit sa maong insidente.

Ang kongresista una na sab mipagawas og pamahayag nga nanghimakak og kalambigitan sa nahitabo sa gobernador ug sa mga tawo didto sa Pamplona.

Ang igsuon ni Teves kaatbang ni Degamo sa nakalabay nga eleksyon diin naproklamar gyud kini nga maoy mananaog apan human sa election protest ni Degamo nigawas nga siya maoy nakadaog hinungdan nga gipapakanaog ang igsuon sa kongresista. — /IBM (BANAT NEWS)