12 ka mangunguot nga mga dayo nasikop sa kapolisan

CEBU, Philippines — Nadakpan sa kapolisan sa Rehiyon Siete ang 12 ka banggiitang mangunguot nga nakabiktima og mga lokal ug langyaw nga nanan-aw sa Sinulog Grand Parade diha sa South Road Properties kagahapon.

Matud ni Police Regional Office-7 Director Brigadier General Jerry Bearis nga ang mga nadakpan pulos mga dayo gikan sa Ormoc ug Luzon.

Sa report sa kapolisan gilauman na nila ang ingon ani nga insidente hinungdan nga apil kini sa ilahang security planning ug aduna na silay gipakatap nga mga personnel aron mabantayan ang ilang mga lihok.

“Diay toy nag-report sa MAC, the RD, the Task Force Commander was here to monitor nakita nato nga diay nga victims most of them foreigners then subsequently nag-adjust were able to arrest the suspects”, suma ni Police Lt. Col. Gerard Ace Pelare, tigpamaba sa Police Regional Office-7.

Sagad sa mga nakuha sa mga suspetsado mao ang cellphones, pitaka hinungdan nga giawhag nila ang katawhan nga mag-amping.

Migamit sab og teknolohiya ang kapolisan subay na sab sa kamanduan ni PRO-7 Director Brigadier General Jerry Bearis, nga duna sila’y drones ug mi-deploy og tawo nga mo-operate niini.

Nasayran nga moabot sa kapin singko mil ka mga security personnel ang gipakatap sa Sinulog Grand Parade gikan sa nagkalain-laing agencies ubos sa Task Force.