CEBU, Philippines — Niabot na ngadto sa 82 ka tawo ang naisyuhan og citation tickets sa mga tinugyanan sa Cebu Environmental Sanitation and Enforcement Team (CESET) ug Barangay Environmental Officer tungod sa mga nagkadaiyang kalapsan sa ordinansa sa siyudad.
Kini ang gibutyag ni Grace Luardo, pangulo sa CESET sa Banat News.
Matud ni Luardo nga ang mga nahimong kalapasan gilangkuban sa pagpataka og panigarilyo, pangihi, labay og sagbot ug uban pa.0
Nasayran nga ang mga nakalapas sa ordinansa sa siyudad adunay mga taga lain nga lugar ug adunay taga Dakbayan sa Sugbo.
Si Luardo niawhag sa mga mahilig manigarilyo nga dili magpataka og pabulhot sa ilang mga aso ilabi na diha sa mga publikong lugar sama sa sulod ug gawas diha sa Basilica Minore del Santo Niño.
Si Luardo nagkanayon nga P2 mil ang multa sa madakpan sa pagpanigarilyo diha sa publikong lugar.
Matud usab ni Luardo nga aduna sila’y mga portalet nga gipahimutang diha sa pipila ka mga lugar.
Gibutyag ni Luardo nga nagpadala usab sila og sulat ngadto sa mga nagkadaiyang establisamento diha palibot sa Basilica nga dili modawo sa ilang mga pansayan ug mopagamit sila niini. (BANATNEWS)