CEBU, Philippines — Suspek sa brutal nga pagpatay sa maestro nga si Jhun Leo Pañares sulod sa City of Naga Integrated Center for Science, Technology, Culture and Arts sa Barangay Inuburan sa Dakbayan sa Naga nadakpan na sa kapolisan.
Ang nasikop mao si Elmar Alvarez Gemida,24, nagpuyo sa Balirong sa maong siyudad apan didto na kini nadakpan sa pantalan sa San Carlos City, Negros Occidental.
Matud pa ni Police Lt. Col. Junnel Caadlawon, hepe sa Naga City Police Station, ang panagtambayayongay sa katawhan ug paghatag sa ilang suporta ug pagsalig ang hinungdan nga nakakuha sila og impormasyon bahin sa suspetsado nga ilaha dayong gisubay.
Gibutyag ni Caadlawon nga ang suspek miyembro og fraternity ug kini maoy unang giduol sa kapolisan hangtud nga kini nasubay ug nadakpan.
Sumala pa ni Caadlawon, giadto nila ang lugar nga kasamtangan niining gipuy-an apan giingong nakasibat kini ug ang panag-ilisay ug mensahe niini sa iyang kapuyo nasayran usab kung asa ang nahimutangan niini.
Si Caadlawon miingon nga kompirmado nga si Gemida ang responsible sa maong krimen sanglit ang helmet ug relo nga nahibilin sa crime scene iyaha.
Si Pañares napalgang patay sud sa stockroom sa faculty room sa maong tunghaan niadtong Domingo sa buntag nga wala nay kinabuhi ug nabulit og samad dinunggaban ang kalawasan. Matud pa ni Caadlawon, tulis gyud ang motibo sa suspek tungod kay gidala niini ang kabtangan sa biktima sama sa kwarta ug motor ug pangangkon nalang niini nga dunay nahitabong komosyon tali nilang duha sa biktima.
Kaso nga robbery with homicide ang posibleng ilang ipasaka batok sa suspek.
Nasakmit gikan sa dinakpan ang cellular phone sa biktima, P10 mil nga kwarta ug ang Mio nga motor.
Gipadayag ni Caadlawon, dako usab ug tabang ang kuha nila nga kopya sa CCTV nga maoy ilang gisundan ang katapusan nga tawo nga gikauban sa namatay.
Kaabag sa kapulisan sa Dakbayan sa Naga pagsikop sa suspek ang PNP-San Carlos City, Negros Occidental nga gipangulohan ni Police Lt. Colonel Jesus Mesahon Jr.; Calatrava Municipal Police Station pinangulohan ni Police Major Lumyaen Lidawan ug PNP-Maritime Group and Port Police, San Carlos City nga gipangulohan ni Police Senior Master Sgt. Jessie Cordova.
Ang nangangkon nga napatay niya ang biktima tungod sa pagpanalipod niya sa iyang kinabuhi. Siya mipasangil nga giunhan siya sa maong magtutudlo sa dihang nasuko kini kaniya dihang wala siya mosugot sa gusto niining buhaton.
Dugang pa sa suspetsado, pipila na ka higayon ang ilang panagbayloay ug mensahe ug giangkon niyang pipila ka higayon na siyang nahatagan sa biktima og kwarta.
Ang suspetsado nitug-an nga self-defense ra gayud iyaha ug mipakita siya sa mga samad-samad nga iyang naangkon sa ilang linayogay. Giangkon sab niya nga nakainom siya anang hitabo.
Niangkon sab kini nga wala gayud siya magdahum nga mabuhat niya kadto maong dako iyang pagbasol ug gani gipasalamat pa niya nga nadakpan siya kay makatarong na siya og katulog kay sukad sa hitabo wala pa siya makatulog.
Apan ang igsuon sa magtutudlo nga si Jeppee Pañares miingon nga mas maayong dawaton nalang sa suspek ang silot ug dili na dauton ang imahe sa iyang manghod ug giklaro niya nga walay relasyon ang duha.
Si Mayor Valdemar Chiong, sa iyang bahin nipahalipay sa kapulisan sa dinalian nga pagkasikop sa suspetsado ug nitug-an nga gitunol na niya ang P50 mil nga gisaad niyang reward money ngadto kapulisan alang sa makatumbok sa suspetsado nga nihimo sa krimen.(BANAT NEWS)