Halad Inasal Festival sa Talisay mas panindoton

CEBU, Philippines — Gipadayag ni mayor Gerald Anthony “Samsam” Gullas nga ibalik ug mas panindoton pa ang Halad Inasal Festival sa Dakbayan sa Talisay karong sunod buwan.

Gitinguha sa mayor nga mabalik ang kalihukan sa matag pista human kini naputol gumikan sa pandemya.

Subay sa maong tinguha gitigum ni Mayor Gullas ang mga department heads aron hisgutan ang pagpangandam.

Si konsehal Lester Daan, chairman sa committee on socio cultural arts niduso og resolusyon sa pagdeklarar sa buwan sa Oktubre nga tourism, arts and culture activity.

Iyang gipasabot nga gikan sa Oktubre 1 hangtud sa Oktubre 31 naa gyud silay gitagana nga kalihukan nga tipik sa kapistahan sa patron sa Talisay nga si Sta. Teresa de Avila matag Oktubre 15.

Makita sab ang night market sa Poblacion ug sa City Hall grounds.

Dugang pa ni Daan nga ila sab kini nga gigahinan og pundo karon nga nabalik na sa normal ang tanan.

Samtang mosugyot og dugang pwersa ang kapolisan sa Dakbayan sa Talisay ngadto sa ilang labaw nga buhatan alang unya sa mga kalihukan sa kapistahan.

Si Police Lt. Col. Randy Caballes, hepe sa kapolisan nibutyag nga naa pa sila sa inisyal nga pakigtigom uban sa kadagkuan sa simbahan.

Matud pa ni Caballes nga lakip sa ilang kaabag mao ang mga sakop sa City of Talisay-Traffic Operation Development Authority (CT-TODA) ug sa Disaster Team.

Iya sab nga hangyuon ang mga barangay nga mopadala og barangay tanod aron makatabang sa pagbantay sa kaluwasan sa mga tawo. —MEL  (BANATNEWS)