CEBU, Philippines — Nagkapinusilay ang mga residente ug mga gwardiya sa usa ka pribadong luna diha sa Sitio Mangal sa Barangay Punta Engaño sa Siyudad sa Lapu-Lapu kagahapong adlawa, gikatahong duha ka mga tawo ang nangaangol sa hitabo.
Matud pa ni Police Major Jaypee Dagami hepe sa Lapu-Lapu Police Station 2 nga sa ilang pagresponde sa lugar nakadungog pa sila og mga butobuto apan iyang gisalikway nga gikan kini sa mga armas .
“ Naabtan namo didto mga guwardya nalang nagdala og armas mga Blue Guards naka uniporme unya naay mga armas issued firearms. Unya katong pikas, nga katong alleged sila pud daw ang rightful heredero naa didto pagabot namo wala na silay armas,” sigon ni Dagami.
Dugang pa ni Dagami nga pamilyang Monching ang mi-claim nga nanag iya sa yuta nga giingong gibantayan sa maong mga gwardiya nga gi-hire sa Sta. Lucia, us aka land developer nga kompanya.
Matud pa niulbo ang komprontasyon human gipangalihan sa mga pamilyang Monching og mga bato ang agianan.
Gikatahong dili mosugot ang pamilyang Monching nga panangtangon kini sanglit sila maoy dunay katungod sa maong luna hinungdan nga miulbo ang kagubot.
Dugang pa ni Dagami nga dugay na kaayo na panahon nga nagkabangi ang mga guwardiya sa maong land developer ug pamilyang Monching kabahin sa away sa luna.
“Dugay najud na nahitabo maski si Halandong Mayor si Mayor Ahong Chan nagpatunga aron i-settle ilahang claims unya according sa pamilyang Monching dili daw motuman sa sabot ang Sta. Lucia sa ilang gisabotan,” sigon ni Dagami.
Atol sa ilang pagresponde gidisarmahan ang mga guwardya sa ilang mga armas aron ipa ballistics test ug ipaubos sila sa paraffin test aron pagsuta kung nagpaboto sila og armas.
Naka-recover ang kapolisan og mga kabhang sa 45 nga pistola ug .38 revolver ug slug .
Sa pagkakaron padayon pa ang gihimong imbestigasyon sa kapolisan sa nahitabong panagbangi sa yuta.
Subay sa nakuhang impormasyon sa Banat News, usa ka Judith Pagobo, 55, ang giingong natapsingan sa bala sa bukton niini.
Samtang giila usab ang gwardiya nga usa ka Jose Palomar,26, nga giingong naangol sa maong hitabo. Wala pa hinuon matino kun napusilan ba kini o kun kinsa ang nakaangol kaniya.
Si Abduljafar Namli nga residente sa maong dapit miingon nga diha sila sulod sa iyang panimalay kauban sa iyang pamilya dihang kalit nabati ang mga boto sa armas nga mitusaktusak sa ilang atop ug bongbong nga hollow blocks.
Ang mga sakop sa Regional Explosive Ordnance Disposal Team uban sa Special Weapons and Tactics ang gi-deploy sa maong dapit.
Samtang usa sa mga guwardiya nga si Eduard Castillo miingon nga una silang nakadungog og boto sa armas samtang ilang gibantayan ang heavy equipment nga gibutang duol sa barikadang gibutang mga sa residente. – Romeo T. Limpangog/IBM (BANATNEWS)