CEBU, Philippines — Gibutyag sa operation head sa Task Force Ratsada sa kagamhanan sa Siyudad sa Sugbo Kevin Sanchez nga anaa na sa 94% sa north district ug 96 porsyento sa south district ang nahipos nila nga spaghetti wires sa utility companies.
Masaligon si Sanchez nga makab-ot nila ang target nga Pebrero 24, 2022 nga subay sa kamandoan ni Mayor Michael Rama nga mahinlo na ang tanan sa maong petsa.
Nasayran nga ang telecommunication companies nagpadala og dugang tawo nga gikan sa laing lugar kinsa nitabang sa ilang operasyon.
Una nga naumol ang Task Force Ratsada niadtong buwan sa Enero niining tuiga aron motutok sa maong problema.
Nasayran nga nisamot ang problema sa nangapansit nga wires human naigo ang Sugbo sa bagyong Odette niadtong Disyembre 16, 2021.
Tumong sa kagamhanan sa siyudad nga wala nay spaghetti wires sa kadalanan atol sa selebrasyon sa charter day sa siyudad sa Sugbo karong Pebrero 24, 2022.
Ang Task Force Ratsada gilangkuban kini sa personnel sa Cebu City Disaster Response Reduction and Management Office; Prevention Restoration Order Beautification and Enhancement team; Cebu City Traffic Office; Department of Public Services; ug Bureau of Fire Protection – Special Rescue Force ug representante sa utility companies. BDB (BANATNEWS)