CEBU, Philippines — Nagpadayon ang imbestigasyon sa Philippine Drug Enforcement Agency sa ubang kabtangan sa self-confessed drug lord nga si Franz Sabalones sa Sugbo.
Kini bisan gi-freeze na ang kabtangan ni Sabalones balor og P350 milyones lakip ang bank accounts duha na ka tuig ang nakalabay.
Matud ni PDEA-7 acting Deputy Regional Director Thessa Albaño- Tiuzen nga nagpaabot nalang sila sa civil forfeiture order gikan sa korte aron hingpit na nga bawion sa gobiyerno ang tanan nga kabtangan ni Sabalones.
Adunay 19 ka kasong money laundering nga gisang-at ang Anti-Money Laundering Council batok ni Sabalones.
Moabot lang sa P10 mil ang kwarta sulod sa bank account ni Sabalones hinungdan nga nagduda ang PDEA-7 nga aduna kini laing mga deposito sa banko nga nakapangan sa laing tawo.
Niadtong Abril 2019 giingong napatay si Sabalones sa Dakbayan sa Quezon.
Samtang nasikop sa kapolisan ang tighatud og shabu sa giingong supplier niini sa Sitio Mustang, Pusok, Dakbayan sa Lapu-Lapu niadtong Miyerkules sa kaadlawon.
Ang dinakpan giila nga si McVince Hinoguin, 38, taga Dakbayan sa Sugbo apan giingong nagtrabaho sa usa ka establisemento sa Dakbayan sa Lapu-Lapu.
Nasakmit gikan sa dinakpan ang duha ka medium-size nga shabu nga balor og P47,600.
Sa lain bahin niabot sa 15 ka tawo diin 10 niini mga menor de edad ang nadakpan sa buy-bust operation sa kapolisan sa Dakbayan sa Talisay sa Sitio Mananga 2, Barangay Tabunok niadtong Martes sa kaadlawon.
Matud ni Police Major Gerard Ace Pelare, hepe sa Talisay City Police Station, nga ang mga menor de edad gigamit sa mga ilegalista sa pagbaligya og drugas sa pagtuo nga dili kini hilabtan.
Nasikop sa managlahi nga oras sila si Rolando Caparida Deiparine, Jessie Madjus Papas, Charlie Cantutoy Conag, Mark Bacus Mancia ug Alamario Amorado Malinog kinsa pulos dunay tagduha ka menor de edad nga kauban.
Sa kinatibuk-an nasakmit ang ilegal nga drugas balor og P18,404.Romeo T. Limpangog, Gabriel C. Bonjoc/GMR (BANATNEWS)