CEBU, Philippines — Ang pangulo sa Provincial General Services Office (PGSO) nga si Jone Seigfred Sepe maoy labing adunahan nga department head sa Kapitolyo basi sa Sworn Statement of Assets and Liabilities and Networth (SALN).
Si Sepe adunay P9, 256, 681. 61 nga total assets ug walay liabilities o utang.
Sa katigayunan ni Sepe, nakapanag-iya siya og 4 ka residential property diin duha niini nahimutang sa Brgy. Quiot ug Brgy. Labangon, Cebu City ug usa sa Sagbayan, Bohol. Aduna usab siyay memorial lot sa Brgy. Banilad ug usa ka agricultural property sa Sagbayan, Bohol. Sa iyang personal properties, aduna siyay duha ka motor, duha ka sakyanan ug usa ka multicab. Nalakip usab niini ang iyang mga alahas, appliances ug adunay cash on hand ug sa bangko nga moabot sa P1.6 milyones.
Ika-duhang labing datu nga department head mao si provincial administrator Atty. Mark Tolentino.
Si Tolentino sa iyang SALN, adunay P7.8 milyones nga assets diin ang naglangkub niini mao ang iyang nakuha nga luna ug balay niadtong tuig 2011 sa Dakbayan sa Sugbo nga moabot sa P7 milyones ug usa ka Toyota 2014 model nga sakyanan nga moabot sa P800 mil. Si Tolentino adunay utang sa bangko nga moabot sa P2.6 milyones hinungdan nga ang iyang net worth moabot sa P5.1 milyones.
Ika-tulo sa labing datu mao si Marie Jeanette Saluba ang IT officer sa Kapitolyo nga adunay total assets nga P5 milyones ug walay utang. Nagsunod kaniya si Rodel Bontuyan, ang pangulo sa Provincial Environment and Natural Resources Office nga adunay total net worth nga P3.8 milyones.
Ang top 5 nga labing datu nga department head mao ang Sangguniang Panlalawigan Secretary nga si Atty. Pulchra Marie Acevedo nga adunay P3.5 milyones nga net worth. Basi sa balaud, ang mga opisyal sa gobyerno, elected man o appointed kinahanglang mosumiter sa ilang SALN matag tuig ngadto sa Office of the Ombudsman. (/DILT)(BANATNEWS)