Arturo Bas nagpanglingi pa sa politika

CEBU, Philippines – Naa gihapon sa kaikag sa politika si Konsehal Arturo Bas sa Dakbayan sa Talisay sumala pa sa kauban niini sa dugay nga panahon nga si Bise Mayor Alan Bucao.

Si Bas niduso sa iyang leave konseho human gipatay ang iyang apo nga si Barangay Konsehal Art Stephen Bas niadtong Hulyo 20. Nisamot ang iyang pagbangotan dihang gipatay sab ang iyang anak nga si kanhi kapitan Mark Ferdinand “Dindin” Bas dili pa lang dugay.

Matud ni Bucao nga nagplano si Arturo nga mobalik sa sunod nga buwan apan iyang gihuwat ang higayon kun luwas ba sila karong panahona ingon man kaya na ba niya nga atubangon ang iyang pamilya sa kasakit nga nahiaguman.

Hinoon wala sila maghisgut nga mo-resign kini sa iyang posisyon isip konsehal sa dakbayan.

Si Bas wala na maapil sa line-up sa grupong Alayon sa sunod tuig nga piniliay. -/GMR (BANAT NEWS)