CEBU, Philippines – Gilusad na kagahapong adlawa ang ‘Clean Rider’ diin ang pipila ka motorsiklo gipangbutangan og mga sticker lakip ang lisensiya sa drayber niini timailhan nga wala kini malambigit sa ilegal nga buhat.
Ang direktor sa Police Regional Office (PRO)- 7 nga si Police Chief Superintendent Debold Sinas nagkanayon nga dako kini og tabang sa paglain sa mga law abiding nga mga motorista.
Butyag ni Sinas nga dili basta-basta nga makakuha sa maong sticker diin ang drayber nga magparehistro aron makakuha og sticker kinahanglan nga mopresentar kini og Official Receipt (OR) ug Certificate of Registration (CR) sa ilang motorsiklo ug driver’s license ngadto sa police station.
Ang Land Transportation Office (LTO)-7 Regional Director Victor Emmanuel Caindec giingong nipasalig nga maoy mohatag sa hardware nga gamiton sa database sa kapolisan alang sa maong proyekto.
Ipaubos og background investigation ang kadtong buot nga mo-apply sa Clean Rider.
Ang mga polis nga mag-checkpoint mosusi sa sticker sa motorista kong tukma ba ang sticker niini sa iyang motorsiklo ngadto sa iyang driver’s license.
Ang nahisgutang ahensiya magpahigayon og monitoring sa mga mopalusot og mga sticker. Atol sa launching kagahapon, 500 ka miyembro sa mga motor riding clubs dinhi sa Sugbo ang unang nagparehistro. (/BDB)(BANAT NEWS)