Kapitolyo nag-half day tungod sa linog

CEBU, Philippines – Mga kawani sa Kapitolyo ingon man sa dakbayan sa Talisay gipapauli og sayo kagahapon sa buntag human mitay-og sa Visayas ang 4.7 magnitude nga linog. Gideklarar ni Gobernador Hilario Davide III nga half day o tunga sa adlaw lang ang trabaho sa mga kawani sa Kapitolyo.

Gihimo kini aron mainspeksyon ang building sa Kapitolyo kun duna bay danyos ug aron usab masusi sa mga kawani ang ilang mga panimalay.

Samtang sa dakbayan sa Talisay, nag-half day ra usab ang city hall subay sa mando ni Mayor Johnny De Los Reyes human maglumbaanay panganaog ang mga kawani gikan sa upat ka andanang edipisyo tungod sa linog.

Hinuon walay gika-report nga nangaangol atol sa dinaganay sa mga kawani padung sa parking area. Ang City Disaster Risk Reduction Management Office nisusi na sa posibleng danyos sa maong linog.

Sa laing bahin, nahunong og makadiyot sa linog ang pagpanumpa sa mga sakop sa Bantay Dagat sa dakbayan sa Mandaue kagahapon diha sa gymnasium sa Barangay Looc nga gitambongan ni Mayor Jonas Cortes, Bise Mayor Glenn Bercede ug mga sakop sa konseho.

Nagsugod na unta sa paghatag og mensahe si Looc Barangay Kapitan Cesar Cabahug apan napakgang kini dihang kalit nga miuyog ang yuta.

Tungod niini, nanggawas ang tanan pinangulohan ni Cortes. – /EIM) (BANAT NEWS)

Show comments