CEBU, Philippines - Duha ka tawo ang napatay ug laing usa ang naangol atol sa pinusilay nga nahitabo sa usa ka tigbakayan sa Baragay Sibacan, dakbayan sa Danao kaniadto’ng Miyerkules sa hapon.
Ang namatay mao sila si Joselito Bacang, 39, minyo taga Highway Looc, Danao ug Ederlito Batucan, 30, nagpuyo sa Barangay Sibacan. Ang naangol mao si Abundio Batucan, 57, nga amahan ni Ederlito.
Sa wala pa mahitabo ang pagpamusil, si Bacang ug ang 57-anyos nga Batucan nagkalalis kabahin sa ilang pagpustaanay.
Ang anak ni Batucan nga si Ederlito miduol ug miapil sa pakiglalis ni Bacang. Si Bacang nga nagluklok diay og armas kalit mipusil sa amahan ug anak. Ang duha ka laing anak ni Abundo Batucan nga sila si Cornelito ug Raingie, mga hingkod na, kalit nga miabot ug giingon nga gitabangan nila’g pusil si Bacang nga maoy nakaingon sa iyang kamatayon.
Si PO2 Ronald Gomez, desk officer sa Danao Police Station, miingon nga duna’y tigbakay nga gipahigayon sa Barangay Sibacan kabahin sa ilang pista. Ang amahan ug anak nga bansagon og Batucan gidala sa Vicente Sotto Memorial Medical Center (VSMMC) apan wala magdugay nakabsan sa iyang kinabuhi si Ederlito.
Sigun pa ni PO2 Gomez nga base sa paghulagway sa mga residente sa lugar nga adunay gubat didto sa tigbakayan.
Gikataho nga sagad sa mga tawo sa Danao duna g’yuy armas tungod kay ang mao nga siyudad naila nga buhatanan sa mga paltik nga pusil. Ang magsuon nga nakapatay ni Bacang misibat ug wala pa madakpi sa kapolisan. (BANAT NEWS)