CEBU, Philippines – Samtang wala pa hingpit giuswag ang pagpahigayon sa Sangguniang Kabataan (SK) sa tuig 2016 , ang Commission on Elections mipahibalo nga himuon g’yud kini sa gitakdang petsa karong Pebrero 21, 2015.
Si Comelec Provincial Supervisor Lionel Marco Castillano nagkanayon nga ang lakang sa pag-postpone sa eleksiyon sa SK anaa pa lang sa 3rd reading sa Ubos Balay Balauranan ug wala pa maabot ngadto sa Senado.
Samtang gihikay pa sa mga magbabalaod ang planong pagsibog niini og petsa, gipangandaman gihapon sa Comelec ang Pebrero 21 sumala pa ni Castillano.
Gibutyag ni Castillano nga ang election period magsugod na karong Enero 22, 2015 adlaw nga Huwebes ug matapos kini sa Marso 2, 2015 sa adlaw nga Lunes, nagpasabot kini nga magsugod na nianang petsaha ang gun ban.
Kadtong “law enforcement agencies” na lang nga on-duty ang tugotang makadala og armas ug walay exempted ilabi na sa mga sibilyan.
Gipahinumdum usab ni Castillano nga apil sa “ban” ang pag-detail o pagbalhin sa kawani sa gobiyerno atol sa election period. Ang filing sa certificate of candidacy (COC) himuon sulod lang sa tulo ka adlaw sa Pebrero 7, adlaw’ng Sabado; 9, adlaw’ng Lunes; ug 10, adlaw’ng Martes. Matud ni Castillano nga gikan sa alas 8:00 sa buntag hangtud sa alas 5:00 sa hapon sila modawat og COC ug wala na kini extension.
Gikan sa Pebrero 11 hangtud sa Pebrero 19 ang pagpahigayon og pagpangampaniya sa mga kandidato. Atol sa campaign period , magsugod na usab ang “public works ban” o pagpatrabaho sa mga proyekto sa gobiyerno gawas kung nasugdan na ang proyekto sa wala pa ang election period.
Sa Pebrero 20 usa ka adlaw sa dili pa ang eleksiyon wala na’y tugotan nga mangampaniya.
Ang mga mikandidato gikatakdang pasumitihon sa ilang “Statement of Contribution and Expenditures (SOCI) sa Pebrero 22 hangtud sa Marso 23, 2015 ngadto sa buhatan sa election officer diin sila mi-file sa ilang COC.
Matud ni Castillano nga niining tuiga mubo lang ang termino sa SK tungod kay sa sunod tuig gikatakda na usab ang synchronized election sa SK ug barangay.
Gipasabot ni Castillano nga walay balaod nga niining tuiga ipaubos sa tulo ka tuig ang termino sa mga mapiling opisyal sa SK.
Dugang ni Castillano nga naghuwat na lang siya sa election paraphernalia gikan sa Manila. Sama sa kaniadto mano-mano gihapon ang pagpahigayon sa SK election niining tuiga.
Subay niini, karong Pebrero 1 hangtud 28, 2015 suspensohon ang tanang pagpahigayon og registration alang sa 2016 Elections aron mahatagan og kahigayonan ang Comelec sa pagpangandam alang sa sunod tuig nga election. – /EIM) (BANAT NEWS)