Tulis sa pawnshop maayo’ng pagkaplano

CEBU, Philippines - Ang usa sa mga mitulis sa Palawan Pawnshop sa Mandaue nasuta sa kapolisan nga mao usab diay ang responsable sa mga nangaging tulis sa dakbayan.

Kapin sa tunga sa milyon ka pesos ang nakuha sa mga tulisan gikan sa pawnshop sa Barangay Alang-Alang, Mandaue.

Matud ni Inspector Zenaido Sanchez, hepe sa Theft and Robbery Section sa Mandaue City Police Office, nga sa wala pa tulisa ang Palawan Pawnshop sa Barangay Alang-Alang, may intelligence report sila’ng nadawat nga tulison ang pawnshop sa Estancia, Mandaue.

Kini maoy hinungdan nga ang pawnshop sa Estancia maoy ilang gipanid-an apan sila ra usab diay ang gibantayan sa mga tulisan ug laing branch ang gibiktima.

Gihulagway ni Sanchez nga maayo ang pagkaplano sa tulis ug gitun-an g’yud og maayo sa mga tulisan. Ang kapolisan may nakuha nga kopya sa CCTV gikan sa pawnshop ug ilang nakita ang kapaspas sa lihok sa mga tulisan.

Makita sa CCTV nga dunay kustomer nga miduol sa pawnshop samtang ang gwardiya nagbarog ug nagbantay apan paglabay sa pipila ka gutlo ang mga suspek nga luwan sa motorsiklo mition dayon sa ilang armas ngadto sa guwardiya nga nakalitan.

Ang mga suspek pulos nagsul-ob og full faced helmet  diin ang nakasul-ob og yellow t-shirt maoy nagkuha sa armas sa guwardiya samtang ang usa ka kauban niini nga nakaitom maoy mikuha sa mga alahas ug uban pang mga butang. (BANAT NEWS)