CEBU, Philippines - Gikawatan ug gipusil patay ang usa ka videoke technician samtang ang biktima sulod sa usa ka imnanan didto sa Barangay Hipodromo, dakbayan sa Sugbo kagahapon sa kaadlawon.
Wala pa mahibaw-i sa kapolisan kon kinsa ang mipatay ni Faustino Alferez, alyas Otsoy, 35, ug nagpuyo sa maong lugar.
Matud ni SPO4 Rey Cuyos, imbestigador sa Homicide Section sa Cebu City Police Office (CCPO), nga ang biktima kuyog sa iyang amigo nga si Juanito Dimafelis nag-inom og beer sa imnanan.
Human sa ilang panag-inom, miuli ang amigo sa biktima ug nagpabilin nga nag-inusara si Alferez sa mao nga dapit. Dunay tawo nga miduol kang Alferez ug ang duha nag-away.
Misukol pa unta si Alferez apan gikalitan siya’g pusil kaduha ka higayon ug dali nga misibat ang kriminal paingon sa MJ Cuenco Avenue. Nakaangkon og samad-pinusilan ang biktima sa iyang likod nga miresulta sa iyang pagkamatay.
Base sa pasiuna nga imbestigasyon nga usa sa mga motibo sa pagpusil sa biktima mao ang pagpanulis. Ang amigo sa biktima miingon nga may silver nga kwentas si Alferez.
Human sa pagpamusil, nahanaw na ang kwentas nga gisuot sa biktima. (BANAT NEWS)