Lahugay sa mga hepe sa CCPO ipatuman karong adlawa

CEBU, Philippines - Hulipan sugod karong adlawa ang tulo o upat ka hepe sa kapolisan sa dakbayan sa Sugbo sumala pa ni Sr. Supt. Noli Romana.

Sumala pa ni Romana nga niadto pang nagsingabot nga Sinulog niya giplano ang lahugay apan karon lang niini na-implimentar.

Dugang niini nga gihatagan na niya og lugway ang maong mga hepe sa pag-improve sa ilang performance.

Matud ni Romana nga ang mga hepe nga maapektohan ibalhin sa laing buhatan apan wala kini nagkahulogan nga ibalhin sila sa laing estasyon sa kapolisan.

Posible nga ibutang ni Romana ang maong mga hepe ngadto sa mga special units sa dakbayan.“Tinitingnan natin kasi baka mas effective sila sa next assignment,” dugang ni Romana.

Matud ni Romana nga ang maong desisyon niya sa paglahugay wala nag-ugat sa pipila ka insidente sa pinusilay ug tulis sa dakbayan.

Matud pa sa usa ka ‘insider’ nga sukad niadtong Enero hangtod kagahapong adlawa 25 na ka insidente sa pagpamusil ang natala sa kapolisan.

Niining semanaha lang gipusil patay si Richard Seno sulod sa apartment niini sa  dalan Urgello sa barangay Sambag II.

Busa nanawagan si Romana sa katawhan sa dakbayan nga moboluntaryo sa ilang serbisyo aron sa pagtabang sa pagbantay sa kahusay ug kalinaw sa dakbayan.

Ang maong mga volunteers mokuyog sa kapolisan sa pagpatrolya sa kadalanan, dili kini sama sa mga tanod ug sa uban nga mga force multipliers kondili mga ordinaryong molupyo nga gustong makatabang sa katilingban.

Sa pagkakaron duna nay 55 ka mga volunteers ang dakbayan nga gidestino sa nagkadaiyang police stations. (/EIM)(BANAT NEWS)