CEBU, Philippines - Sinkhole nga nakit-an sa Poblacion Uno sa dakbayan sa Tagbilaran sa Bohol ang hinungdan nganong dili pa pabalikon sa Mines and Geosciences Bureau (MGB) ang mga molupyo sa maong lugar. Matud pa ni Eddie Llamedo ang tigpamaba sa MGB nga niadtong Oktubre 28 gisusi sa ilang buhatan ang maong sinkhole ug daling nasuta nga ang naka-trigger niini mao ang magnitude 7.2 nga linog. Busa miluwat og Geohazard Advisory ang MGB ug lakip sa ilang rekomendasyon ang pagpahikling lang una sa mga residente sa maong lugar ug regular nga monitoron ang lihok sa maong sinkhole. Matud pa ni Llamedo nga ang maong sinkhole may gilapdon 3-4 metros ug may giladmon nga 5 metros apan daghang mga tension cracks ang nakit-an sa maong lugar.
Padayon pang gi-evaluate sa MGB ang kahimtang sa maong lugar kun angay ba kining mapuy-an og tawo sa umaabot.
Human nga makaluwat og advisory ilang gipahibalo ang kapitan sa maong barangay ug ang mayor sa dakbayan sa Tagbilaran nga si Mayor John Geesnell Yap aron usab mapahibalo ang mga residente sa maong lugar.
Apil sa rekomendasyon ang pagbutang og signage sa maong dapit ug ang pagkordon niini aron dili na masudlan og tawo ang maong sinkhole. Matud pa nga apektado ang mga molupyo sa Purok 6, 7 ug 8 sa barangay Poblacion Uno sa maong sinkhole. (BANAT NEWS)