CEBU, Philippines - Duha ka bugaw ug lima ka babaye nga giingong mga prostitute ang gidakop sa kapulisan sa gipahigayon nga entrapment sa Barangay Capitol Site, dakbayan sa Sugbo niadtong niaging Martes sa gabii.
Ang duha ka mga bugaw, pulos babaye nagpangidaron og 20 ug 29, samtang ang mga gihulagway nga prostitute nga ilang gibugaw nagpangidaron og 19, 20, 35, ug duha ka 26.
Ang mga suspek, kansang mga ngalan gipugngan sa Banat News tungod sa kasensitibo sa ilang kaso nagpuyo sa nagkalain-laing barangay sa syudad sa Sugbo.
Matud pang Insp. Jesus Arong sa Investigation and Detective Management Branch sa Cebu City Police Office, nakadawat sila og taho nga dunay pagpamugaw nga nahitabo diha sa Juana Osmeña Boulevard.
Ang mga suspek nagbarogbarog sa maong dapit duol sa usa ka iladong restaurant nga daw dunay mga gipaabot.
Si PO2 Crisostomo Bayato, Jr. kauban ang usa ka-sakop sa Barangay Peace-keeping Action Team (BPAT) ang miduol sa mga suspek ug nagpakaaron-ingnong ‘moabang’ og mga babaye. Human dawata ang P1,000 sa duha ka bugaw dali silang gidakop. Kasong kalapasan sa Article 341 ug Article 202 sa Revised Penal Code in relation to Republic Act 9208 kon Anti-Human Trafficking in Persons Act ang ipasaka batok sa duha ka bugaw.
Ang RA 9208 aduna nay kausaban human kini giamendahan ug napasar ang RA 10364 kon Expanded Human Trafficking in Persons Act of 2012 nga nag-ingong mahimo nang panganlan ang mga accessories sa human trafficking cases aron sa ingon dili na sila makabiktima pa og uban.
Si Arong nagkanayon nga ila usab pasakaan og kasong prostitution ang lima ka mga bugaw. “File-an usab sila kay during sa negotiation, naa man sila. Kita man sila paghatag sa kwarta. Aware man sila nga gibayaran sila,†matud pang Arong.
Matud pa kang Arong, naghitak ang pagpamugaw sa maong dapit.“Usually sa gabii, naa g’yud na sila diha mangatang og mga foreigner. Daghan mang mga pension houses duol diha,†dugang pa ni Arong. Ang mga suspek natanggong karon sa CCPO detention cell samtang giandam ang kasong ipasaka batok kanila karong adlawa. (BANAT NEWS)