Jailguard nga mipatay sa opisyal hayan taktakon
CEBU, Philippines - Ang Bureau of Jail Management and Penology (BJMP) aduna nay igong basehan sa pagpasaka og kasong grave misconduct batok kang Jail Officer 3 Donald Ramas, kinsa mipusil patay kang Jail Inspector Anaclito Dusaran ug miangol kang Jail Officer 2 Maria Milamid Abella.
Ang imbestigasyon gipahigayon kini ni Sr. Insp. Noel Ybarsabal ug ang maong kaso gisumitir na sa national headquarters.
Si Supt. Efren Nemeño, deputy provincial director for administration, mibutyag nga posibleng mataktak gikan sa BJMP si Ramas. Si Ramas mipusil patay kang Dusaran human giingong wala motugot ang naulahi nga mo-file og leave of absence si Ramas.
Patay diha-diha si Dusaran samtang si Abella samdan sa lawas niini nga hangtud karon anaa pa gihapon sa kritikal nga kahimtang sa Intensive Care Unit sa South General Hospital.
“Gi-abunuhan to siya og dugo kay naigo man iyang pancreas and liver,†matud ni Nemeño.
Ang BJMP nag-amot-amot karon aron ilang ikatampo sa gastuhan sa ospital ni Abella samtang gi-proseso pa ang medical assistance niini. Ang pamilya usab ni Dusaran nakadawat na og hapit P200,000 nga special financial assistance.
Si Nemeño midugang nga kadtong mga jail officers nga diha sa maong hitabo adtong Biyernes sa udto ang i-undergo og stress debriefing karong Lunes. Mimando na usab si Nemeño kang SJO4 Johan Alatraca, Toledo City Jail officer-in-charge, sa pag-secure sa mga piniriso. Iya na usab nga giawhag ang tanang jail warden nga makig-estorya gyud sa ilang mga sakop aron sa paghatag og kasulbaran sa unsa mang problema sa ilang buhatan. (BANAT NEWS)
- Latest
