CEBU, Philippines - Pagpasaka sa sweldo ug pagwagtang sa kontraktwalisasyon ang nag-unang buhaton ni Junex Doronio sa higayon nga mapili siyang kongresista sa Cebu City North District karong Mayo 13.
Kini naglakip sa sweldo sa mga yanong mamumuo, magtutudlo sa pangpublikong tunghaan, mga nars, kapolisan, kasundalohan ug ubang kawani sa gobyerno.
Usa sa iyang tinguha ang pagwagtang sa kontraktwalisasyon nga nalatid sa Labor Code of the Philippines nga giingong giabusohan sa mga dagkung kompaniya.
Matud pa ni Doronio nga minaot ang pasiatab sa kasamtangang administrasyon nga nilambo ang ekonomiya sa nasud apan ang tinuod nag-antos gihapon ang mga mamumuo sa gamay’ng suholan. Iyang gitumbok ang pagtoon nga gihimo sa Ecumenical Institute for Labor Education and Research nga nagpakita nga matag pamilya mogasto og dili mominus P10,850 matag buwan sa pagkaon, abangan, kuryenti, tubig, transportasyon, ubang personal nga kagamitan lakip na ang load sa cellphone.
Kung siya mapili, iyang iduso ang balaudnon nga maghatag og kasegurohan sa panarbaho ni bisan kinsa, scholarship programs, skills training ug pagpalambo sa talento sa mga batan-on, healthcare for all, desenting panimay ug tabang sa mga gagmay’ng negosyo. (/EIM) (BANAT NEWS)