CEBU, Philippines - Armas ug mga pinaketeng gidudahang shabu ang nasakmit sa kapulisan sa duha ka mga lalaki nga sakay og motorsiklo dihang naaktuhan sa gipahigayong checkpoint sa kapulisan sa highway sa barangay Bateria sa lungsod sa Daanbantayan niadtong Miyerkules sa alas 9:50 sa gabii.
Ang nadakpan sa checkpoint mao ang drayber sa motorsiklo nga si Regie Noynay, 23, taga Sitio Franco, barangay Tindog sa lungsod sa Medillen ug ang angkas niini nga si Ricky Ruiz,19, ug molupyo ra usab sa maong dapit.
Nakuha gikan sa ilang posisyon ang kalibre .45 nga armas gikan ni Noynay samtang ang ilegal nga drugas diha nakuha sa U-box sa motor uban sa upat ka bala sa kalibre .38 ug pag rekisa sa angkas nga si Ruiz nakuhaan usab kini og kutsilyo.
Matud ni PO3 Alfredo Mandal sa Daanbantayan Police Station dihang nahinabi sa Banat News kusog kaayo nga nagpadagan sa ilang motor ang duha ug wala na makamatikod sa police checkpoint.
Misuway pa gyud unta sila og U-turn apan napugngan dayon sa mga polis ug diha na nabisto nga duna silay ilegal nga gidala. Ang duha pasakaan og kasong illegal possession of firearms, kalapasan sa Comelec gun ban ug paghupot og gidiling drugas. (Darrel A. Carumba/EIM) (BANAT NEWS)