CEBU, Philippines - Sud sa 11- minutos duha ka mga tindahan sa dakbayan sa Mandaue ang natulis sa duha ka mga armadong tulisan nga nagsakay og itom nga Honda Wave motorsiklo.
Unang nabiktima mao si Francisco Cortes,55, tag-iya sa Quito Enterprises nga anaa mahimutang sa brgy. Maguikay dakbayan sa Mandaue.
Matud pa ni SPO2 Edmundo Billocura nga ang nahisgutang duha ka mga suspetsado ang nagpakaaron-ingnon nga mga kustomer ug nangutana og presyo sa Coke ngadto sa tindera nga si Merlinda Batiancela,18.
Human mangutana mideklarar dayon og tulis ang duha ug si Cortes nga naratol niadtong higayuna kalit nga mibunot sa iyang pitaka nga adunay kantidad nga usa ka libo ka pesos ug nadala usab iyang mga ATM cards.
Nadala usab nila ang bag ni Batiancela nga adunay sud nga P500 ug daling mibiya sa maong dapit. Paglabay sa 11-minutos gitulis ang JBS Store nga anaa mahimutang sa Brgy. Casuntingan diin susamang modus usab ang gigamit sa mga tulisan.
Nakuha usab sa mga suspetsado ang pitaka sa tag-iya sa maong tindahan nga si Gerry Andrino nga adunay sud nga P4,000 ug daling namiya sa lugar.
Ang kapolisan nagduda nga usa ra ka grupo ang nagtulis sa duha ka mga tindahan tungod sa pagkaparehas sa modus ug gisakyang motor. (BANAT NEWS)