CEBU, Philippines - Pangitaan na og Identification Card (ID) ang bisan kinsang mosulod sa Kapitolyo samtang tensyonado pa ang sitwasyon.
Kini gipatuman human sa command conference kagahapon sa buntag sa Police Regional Office7, matud pa ni Supt. Leopoldo Cabanag, ang commanding officer sa Regional Public Safety Batallion nga maoy nangulo sa grupo nga nagbantay sa Kapitolyo.
Ang mga mobisita papirmahon usab sa logbook aron masayran unsay ilang katuyoan sa pagbisita sa Kapitolyo.
Unang nakapirma sa logbook kagahapon mao ang pito ka barangay kapitan sa lungsod sa Barili nga gipangulohan sa presidente sa Association of Barangay Councils, Norman Anore, kinsa mibisita sa suspendidong gobernador, Gwendolyn Garcia.
Ang lakang sa kapolisan nakapasuko sa amahan ni Garcia nga si Deputy Speaker Pablo “Pabling” Garcia human niya masayri nga gipugngan ang mga kapitan sulod sa 30 minutos sa gawas sa Kapitolyo samtang nagpalit og logbook.
Ang mga kapitan giingong gisukitsukit pa sa kapolisan kung unsay ilang partido, kang Garcia ba o kang acting Gov. Agnes Magpale.
Gipahimangnoan ni Pabling si PRO-7 Director, C/Supt. Marcelo Garbo, kay ang gihimo sa iyang mga sakop dakung kalapasan sa batakang balaud.
“Naa bay balaud nga maglakaw ang tawo pangutan-on ka unsay imo tuyo, unsay imo ngan,” matud pang Pabling.
Matud pa niya nga labaw pa sa Martial Law ang kahimtang sa Kapitolyo nga gilibotan og dul-an sa usa ka gatos ka mga polis.
“Ang atong kagamhanan wala nagrespetar sa mga Sugbuanon,” matud pang Pabling.
Giawhag ni Pabling si Garbo sa pagsusi sa iyang mga kamandoan sa kapolisan.
“Mao ba ni tilimad-on nga nagpadulong na ta sa martial law?” sumala pa ni Pabling.
Mismo si Arsobispo Jose Palma wala makalikay sa pagsukitsukit sa iyang tuyo sa dihang mibisita siya kang Gwen niadtong Biyernes sa gabii. Si Cabanag nagdumili sa pagtubag sa pasangil sa mga barangay kapitan sanglit si Garbo lang ang makatubag niini.
Si Gwen naglibog usab sa papel sa kapolisan sa ilang pagbantay sa Kapitolyo.
“Magbalantay na sila sa kalinaw or magbalantay ni Magpale,” matud pang Gwen. —(WC) (BANAT NEWS)