CEBU, Philippines - Usa ka tindahan sa karne nga adunay convenience store ang giingong gilungkab sa tulo ka wala mailhing kawatan ug gisakiyo ang dili mominos sa P800,000 nga halin niini niadtong Lunes sa kaadlawon sa Barangay Poblacion, Liloan.
Si Loreto Ortega Bugtai, 37, taga Barangay Catarman ug habal-habal driver ug ang pasahero niining nailhan lang sa pangalang Terry giingong maoy nakabantay sa tulo ka mga kawatan gikan sa maong establisamento.
Gipahibalo ni Bugtai ang kapulisan dihang mibalik na siya gikan naghatod sa iyang pasahero ug mihulagway sa mga kawatan nga 5’6” ang gitas-on ug sakto sa pamarog. Ang usa nila giingong gamayon ug mga 5’4” ang gitas-on samtang ang ikatulo anaa lang nagpahipi sa ngitngit nga bahin sa tindahan.
Si Insp. Socrates Medillo, hepe sa Liloan Police Station, mibutyag nga ang mga kawatan nakasulod sa maong tindahan pinaagi sa paguba sa roll-up door gamit ang bolt cutter ug wrecking bar ug giguba ang cash vault diin ang kwarta nahimutang.
Sa gibuhat nga ocular inspection, na-recover sa kapulisan ang padlock, coin rack, wrecking bar, ug 14” cap 6.0 bolt cutter nga gituohang maoy gigamit sa mga kawatan sa pagsulod sa tindahan.
Si Medillo midugang nga ang tindahan aduna untay close-circuit television camera apan wala kini mag-function.
“Naa untay CCTV but wala gigamit pwede ra unta to ug adto mi magbase kay nakuha namo ang identity,” matud ni Medillo. Mihimo og hot pursuit operation ang kapulisan apan pakyas kini sa pagdakop sa mga kawatan. Mitawag na si Medillo sa Crime Scene Investigation (CSI) sa Cebu Provincial Police Office (CPPO) alang sa imbestigasyon. (EIM) (BANAT NEWS)