CEBU, Philippines — Duha ka mga welders ang naangol human nakuryentihan samtang nagtrabaho sa usa ka balay sa Sitio San Roque, Barangay Lahug, siyudad sa Sugbo niadtong Miyerkules sa hapon, Marso 26, 2025.
Ang mga nakuryentihan mao sila si Cornelio Rivera Soroño, 35, ug si Jason Pantallano Rubio, 32, parehong nagpuyo sa Camagong Street, Barangay Lahug ning siyudad.
Sa impormasyon sa kapulisan ang duha ka aksidente nga nakuryentihan samtang nag-welding sa ikaduhang andana sa balay nga ilang gitrabaho.
Matud pa naigo ang main line sa kuryente hinungdan nga nakuryentihan ang mga biktima ug nakaangkon og paso sa kalawasan.
Niresponde dayon ang kapulisan ingon man ang emergency rescue personnel sa Barangay Lahug.
Ang duha gidala sa Vicente Sotto Memorial Medical Center ug karon anaa na sa maayong kahimtang. (BANAT NEWS)
