CEBU, Philippines — Ang 26 ka opisyal ug job order employees sa kagamhanan sa Dakbayan sa Mandaue niduso sa ilang Motion for Reconsideration (MR) ngadto sa Office of the Ombudsman Visayas kagahapon sa hapon aron i-reverse ang desisyon sa ilang suspension.
Niadtong Lunes, Pebrero 10, 2025 ang mga empleyado gisuspenso kini sa ilang katungdanan sulod sa siyam ka buwan nga walay sweldo.
Kini human nakita sa Office of the Ombudsman nga ang mga respondent nakahimo og kalapasan diin lakip sa maong kalapasan mao ang “Conduct Prejudicial to the Best Interest of the Service”
Si Maria Priscilla Melendres ug Maritoni Melendres ang niduso og reklamo batok sa maong mga opisyal ug kawani sa Dakbayan sa Mandaue tungod sa giingong ilegal nga pagsirado sa ilang lugar ug pagpatuman sa notice to demolish sa usa ka luna diha sa Barangay Paknaanniadtong Mayo 3, 2023.
Giingong ang maong pribadong lugar subject sa ownership conflict tali sa city government ug private claimants.
Ang mga gipasakaan og kasong kriminal ug administratiba ngadto sa Ombudsman gilangkuban sa pangulo sa Housing and Urban Development Office (HUDO) Johnbee Biton, Assistant City Assessor Julius Ceasar Entise, pangulo sa Janitorial and Security Services Unit Teodorico Montojo II, kawani sa Janitorial and Security Services nga si Pedrito Inalem ug 22 ka laing mga empleyado sa city hall.
Ang desisyon nga giluwatan sa Office of the Ombudsman Visayas penetsahan niadtong Disyembre 9, 2024 ug gipirmahan kini ni Graft Investigation and Prosecution Officer II Carl Vincent Sasuman.
Kagahapon si Entise nipadayag nga duha ka managlahi nga MR ilang giduso diin
isip abogado gusto niyang iduso ang iyang kaugalingong MR samtang ang laing abogado mao ang nag-andam sa laing MR alang sa ubang respondents. (BANAT NEWS)