CEBU, Philippines — Duha ka mga polis sa Dakbayan sa Toledo ang gikasohan og murder ug administrative charges sa National Bureau of Investigation Central Visayas Regional Office ngadto sa buhatan sa Visayas Ombudsman may kalabotan sa kamatayon sa usa ka libudsuroy nga ilang unang gipangangkong namatay tungod sa pagkatagak niini.
Ang duha nga gipasakaan og kaso mao silang Patrolman Raymond Zamora Manipis ug PMSG Sepjanrey Espares Roda nga nadestino sa Toledo City Police Station.
Ang duha gipasakaan og kaso tungod sa paglapas sa Article 248 sa Revised Penal Code o Murder, ug kasong administratiba tungod sa paglapas sa Republic Act 6713 o Grave Misconduct.
Ang director sa NBI-CEVRO Atty. Renan Augustos Oliva mibutyag sa mga tigbalita nga nidangop sa ilang buhatan ang pamilya sa namatay nga si Eliseo Peñares Rosento,59-anyos niadtong buwan sa Agusto sa miaging tuig, pipila ka adlaw human sa kamatayon niini. Kini tungod kay nagduda sila sa report sa kapolisan nga namatay kini tungod sa pagkahulog niadtong Agusto 26,2024.
Sa gihimong kaugalingong imbestigasyon sa NBI, nakakuha sila og duha ka testigos nga miingon gikulata sa duha ang biktima anang gabhiuna.
Ang mga testigos gipaubos na sa Department of Justice Witness Protection Program.
Base sa report sa Toledo City Police gikatahong napalgan sa mga nagpatrolyang polis si Rosento nga nagkadugo ug walay panimuot niadtong Agusto 26,2024. Gidudahan nga nahulog kini.
Apan sa pag-autopsy sa lawas nigawas nga namatay kini tungod sa bun-og nga dili makuha kun nahulog lang.
Ang NBI nagkanayon nga mga alas-6:45 sa gabii sa Agosto 26, 2024 dunay nakakita sa maong duha ka pulis nga mibukbok kang Rosento sa sulod sa ilang patrol car nga usa usa ka Mitsubishi Montero duol sa Toledo City Catholic Cemetery sa Poblacion, Toledo City.
“Primero sa cemetery nakakita nga nagsugod didto ang beatings, kay daghan namang tao naabot didto sa gas station, naa puy witness ni testify nga na continue ang beating didto,” matud ni Oliva.
Ang autopsy report nga nakuha sa NBI-7 nagpakita nga namatay si Rosento tungod sa blunt force trauma, intracranial hemorrhage, ug traumatic head injury nga wala magtakdo sa pamahayag sa maong mga polis nga nahulog lang si Rosento.
“During our investigations, we subpoenaed both police officers who denied everything, denied the wrong doing,” matud pang Oliva.
Ang NBI-CEVRO nakigalayon na sa Police Regional Office-7 bahin sa kaso ug gipasaligan matud pa sila nga dili nila tugotan nga dunay mga polis nga moabusar.
Misulay og kontak sa telepono sa Toledo City Police Office ang Banat News, apan walay nihatag og pamahayag. (BANAT NEWS)