CEBU, Philippines — Gibalhog sa prisuhan ang usa ka 18-anyos nga lalake human iyang gidunggab ang 14-anyos nga babaye niyang uyab kay nasuko kini nga gibuwagan diha sa sulod sa tunghaan sa Barangay Mabolo, siyudad sa Sugbo niadtong Lunes sa gabii, Pebrero 10, 2025.
Ang 18-anyos nga suspetsado usa ka grade 10 student samtang ang biktima nga 14-anyos kay Grade 8 student ug pulos taga Barangay Mabolo.
Si Police Major Romeo Caacoy Jr., hepe sa Mabolo Police Station 4 upat pa ka buwan nagkauyab ang suspetsado ug ang biktima.
Apan anang gabhiuna gi-chatan sa biktima ang suspek kay gusto na niini kining buwagan.
Sa dihang nagkita ang duha diha sa second floor sa usa sa building sa ilang eskuylahan gikatahong gibitad ang biktima ngadto sa kasilyas ug didto gidunggab kini sa liog ug sa tangkugo kay nasuko kini nga gibuwagan.
Dali dayung miikyas ang suspek samtang ang biktima gidala dayon sa Cebu City Medical Center.
Sa follow up operation ang kapulisan ilang giadto ang ginikanan sa suspetsado nga maoy nikumbinsir sa pagtahan niini.
Ang pamilya sa biktima gikatakdang mopasaka og kaso batok sa suspetsado. (BANAT NEWS)