CEBU, Philippines — Nadakpan sa mga operatiba sa City Drug Enforcement Unit sa Cebu City Police Office (CCPO) ang duha ka High Value Individual sa ilang buy-bust operation sa Sitio San Juan, Barangay Mambaling, siyudad sa Sugbo niadtong Pebrero 10, 2025, Lunes.
Ang mga dinakpan mao si Ronian Trobia Estor alyas Pogi, 19, ug si Climson Jay Aparese Socajel alyas C-Jing, 19, pulos residente sa Sitio Bohol Village, Barangay Duljo Fatima ning siyudad.
Nasakmit gikan sa duha ang 725 gramo nga shabu nga nibalor og dul-an sa P5 million. Sa impormasyon sa kapulisan, abot sa operasyon sa duha ang Duljo Fatima, Mambaling, Pasil, Suba ug Ermita.
Makabaligya matud pa ang duha og usa ka kilong shabu kada semana. Nasuta sab nga ang ilang kontak sa suplay sa drugas naa sulod sa prisuhan.
Kasong kalapasan sa Section 5 ug 11, Article II sa Republic Act 9165 ang ipasaka batok sa mga dinakpan. (BANAT NEWS)