CEBU, Philippines — Patay ang usa 75-anyos nga lolo human kini na-trap sa iyang gipuy-an atol sa pag-ulbo sa sunog diha sa may Doña Esperanza Village, Barangay Tisa ning Dakbayan sa Sugbo, kagahapon Martes sa buntag.
Ang balay nga nasunog giingong gipanag-iya ni Ronald Dagatan.
Nadawat sa kabomberohan ang maong alarma pasado alas-6 sa buntag ug hingpit nga napawong pasado na alas-7 sa buntag gihapon.
Gibana-bana mga moabot ngadto sa P450,000 ang danyos sa maong sunog, hinuon wala nay laing balay nga naapil og kasunog. Apan nakalas si Francisco Labra kinsa naa ra sa silong naghigda kay kini bedridden na.
Ang tigpamaba sa Cebu City Fire Department Senior Fire Officer 2 Wendell Villanueva, diha nagsugod sa sala ang maong sunog nga maoy nahimutangan sa nakalas.
Sumala pa ni Villanueva, naa sa ikaduhang andana ang mga anak, umagad ug apo sa namatay, apan wa nila kini naluwas kay didto sa sala nagsugod ang kalayo hinungdan nga nanglayat nalang sila pagawas agi sa ilang terrace. Ang Department of Social Welfare and Services pinangulohan ni Portia Basmayor nisusi na sa pamilya nga naapektahan. (BANAT NEWS)