P138 milyon gastuhon para sa anibersaryo sa PhilHealth?

CEBU, Philippines — Kusganong gihimakak sa kadagkoan sa Philippine Health Insurance Corporation (PhilHealth) niadtong Biyernes, Disyembre 13, ang mga alegasyon sa usa ka Dr. Tony Leachon kinsa nipasangil bahin sa pagabusar sa paggamit sa pundo sa ahensiya.

Sa usa ka post sa Facebook, si Dr. Leachon mipasangil nga ang PhilHealth nagplano nga mogasto og P138 milyones alang sa anibersaryo niini.

“Nagagamit naman ng husto pondo ng Philhealth - para sa mga Christmas party contrary to the request of BBM for not spending much this [Christmas] at sa upcoming 30th Anniversary na P138M ang budget," matud niini sa iyang post.

Sa hulagway nga gi-upload niini, makita ang kalkulasyon sa posibleng gastohan sa mga kalihukan ug items sa maong selebrasyon, nga naglakip sa sports meet nga mobalor og P32,703,840.00, nga maoy pinakadako og gigahin, gisundan kini sa Gala Night PROs nga mokantidad og P13,901,400.00, special tokens nga jacket alang sa mga empleyado nga P13,639,600.00 ang magasto, ug uban pa.

Apan gihimakak kini sa PhilHealth, matud pa nila "misinformed" si Leachon ug giklaro nga ang dokumento nga iyang gipasabot adunay kalabotan sa pagsaulog sa ika-30 nga anibersaryo sa ahensya alang sunod tuig, 2025 nga dili pa pinal.

Giklaro sa PhilHealth nga, bisan pa sa mga alegasyon sa sobra nga budget alang sa Christmas party niini, hingpit kining nagsunod sa direktiba sa Malacañang nga minusan ang mga selebrasyon sa ahensya alang sa Christmas Season.

“We wish to clarify that PhilHealth is fully complying with the directive of Malacañang to scale down agency celebrations for the Christmas season,” matud sa ahensya.

Apan gitubag usab kini ni Dr. Leachon pinaagi sa Facebook post niadtong Sabado, nga bisan unsaon kini pag-frame, kung alang ba sa Christmas party o usa ka milestone anniversary, dako kaayo kini nga kantidad  para gahin lang sa mga selebrasyon sa PhilHealth.

Gihulagway niya nga insensitibo ug sobra ka garboso sa panahon nga milyon-milyon nga mga Pilipino ang nag-antos, nag-atubang sa wala mabayran nga mga claims, nagtubo nga gasto sa medikal nga pag-atiman, ug kakulang sa access sa healthcare apan ang pundo sa publiko wala magamit sa hustong paagi.

"Let this serve as a wake-up call! We need fiscal responsibility and compassion from our institutions now more than ever. The Filipino people deserve leaders who are willing to forgo pomp and ceremony for the greater good.

Public funds are not for lavish gatherings; they are for life-saving programs, for healthcare access, and for restoring dignity to those who are suffering," dugang niya.  IBM BANAT NEWS