Desilting sa mga sapa angayan paspasan

CEBU, Philippines — Giawhag ni Gobernador Gwendolyn Garcia ang mga pribadong kontraktor nga gitahasan sa pagkabkab o pag-desilt sa duha ka dagkong sapa sa Metro Cebu nga paspasan ang trabaho niini.

Atol sa tigom ni Garcia uban ang mga opisyal sa maong mga kontraktor, nagkanayon ang gobernadora nga importante nga mahuman na dayon ang maong desilting projects sa Mananga River sa siyudad sa Talisay ug sa Lusaran River sa dakbayan sa Sugbo aron masulbad ang problema sa tubig hilabina sa umaabot.

Bulan sa Mayo karong tuiga, gisugdan sa Kapitolyo ang pagpangita og paagi aron masolusyonan ang nibabag sa agas sa tubig sa Sugbo nga maoy usa sa nakita hinungdan nga menus ang suplay sa tubig.

Sumala sa Capitol Information Office, sa Mananga river, ang inadlaw adlaw nga produkyon nimenus og 6, 000 metro kubiko sa tubig samtang ang Lusaran River igo na lang makasuplay og 8, 000 metro cubico sa tubig matag adlaw gikan sa kasagaran nga produksyon niini nga moabot sa 30, 000 metro cubico.

Ang mga kontraktor gimanduan nga kinahanglan nga mahuman ang 15 ka kilometro nga desilting sa Mananga river ug 6.5 kilometro usab sa  Lusaran.

Mitambong sa tigom niadtong Disyembre 11, mao sila si Talisay City Mayor Samsam Gullas, Cebu City Administrator Atty. Kristine Joyce Batucan, Department of Environment and Natural Resources (DENR) 7 Executive Director Paquito Melicor, Environmental Management Bureau (EMB) 7 Engineer Mary Ann Bueno, ug mga representante sa mga kontraktor.   MEL  BANAT NEWS