Board member, kauban gikawatan

CEBU, Philippines — Dakong kantidad nga salapi ug mga alahas ang nasakiyo sa mga wala pa mailhing mga kawatan gikan sa usa ka negosyante kauban ang usa ka board member sa Zamboanga-Sibugay nga mi-checked in sa usa ka resort sa Barangay Agus, Siyudad sa Lapu-Lapu.

Si Police Lieutenant Christian Torres, pangulo sa City Investigation Detection and Management Unit (CIDMU) ug tigpamaba sa LCPO miila sa biktimang negosyante nga mao si 33-anyos, ug babayeng board member nga 56 anyos nga parehong taga Diplahan Zamboanga, Sibugay.

Si Torres miingon nga alas-8 na sa Huwebes sa buntag nadiskubrehan sa mga biktima nga ang lawak nga ilang giestaran gisulod sa mga kawatan.

Nahanaw matud pa ang ilang salapi nga P220 mil ug mga alahas nga mga bulawan ug diamonds nga naglakip sa singsing, bracelet, kuwentas, ariyos, nga ang tanan mokabat sa P1 milyon ang kantidad.

Si Torres miingon nga kasamtangan nilang gihimo mao ang pagsusi sa footage sa mga CCTV camera aron pag-ila sa mga kawatan. (BANAT NEWS)