Amerikanong pugante nadakpan sa NBI-7

CEBU, Philippines — Gidakop sa National Bureau of Investigation (NBI) ang usa ka Amerikanong pugante nga wanted sa kasong pagpanulis ug aggravated assault with deadly weapon niadtong Hulyo 12, 2024 sa Lapu-lapu City, Cebu.

Ang giaresto giila nga si Malik Dejoun Okojie, 26, taga Rhode Island, United States nga nag-adunay standing warrant of arrest sa kasong pagpanulis atubangan sa Regional Trial Court didto sa Dumaguete City ug laing kasong aggravated assault with deadly weapon didto sa State of Texas, USA.

Niadtong Mayo 23, 2023, nakadawat ang opisina sa NBI og email gikan ni Jocelyn Matibag, usa ka Criminal Fraud Investigator sa American Embassy, Manila, nga naghangyo nga pangitaon ang puganteng si Okojie nga katapusang nasigpatan nga nagpuyo sa Canday-ong, sa Dakbayan sa Dumaguete.

Ang NBI-7 nakig-alayon sa mga katugbang sa Dumaguete City ug sa kasikbit nga mga dapit aron madakpan si Okojie apan nakagawas na kini sa maong siyudad.

Apan pinaagi sa impormasyon gikan sa usa ka Facebook post nahibaw-an nga si Okojie nalambigit sa usa ka hit-and-run sa Lapu-Lapu City sa Cebu ug nasuta nga expired na ang lisensya niini.

Nahibaw-an sab nga nag-abang kini og unit sa Deca Homes 1 sa Barangay Marigondon sa Dakbayan sa Lapu-Lapu uban sa iyang asawa nga si Raquel Cuadrado nga usa usab ka langyaw.

Diha-diha dayon, ang operating team nga gipangunahan ni NBI-7 Supervising Agent Atty. Wenceslao Galendez Jr. ug giubanan mismo ni Matibag miadto sa lugar diin nakit-an si Okojie.

Pag-abot sa operating team sa balay diin giingong nagpuyo si Okojie, gisugat sila sa duha ka babaye nga nagpailang asawa niini. Ang unang asawa giila nga si Raquel Cuadrado usa ka langyaw samtang ang laing asawa mao si Marie Fe Gray, usa ka Filipina.

Miingon ang duha nga ang ilang bana mibiya sa balay pipila ka oras ang milabay kay mobisita sa usa ka higala apan mobalik ra kini dayon.

Pipila ka minuto ang milabay, niabot sa maong dapit ang laing langyaw nga gihinganlan og Justan Larrell Fryson. Matud niini nga nibisita lang siya sa usa ka higala didto, apan nabutyag nga si Fryson ug Okojie nagkuyog apan si Okojie mikanaog sa ganghaan sa subdivision.

Ang mga operatiba daling niadto sa gate ug didto nakit-an nila gawas sa subdivision si Okojie nga misuway sa pag-ikyas apan malampuson nila kining nasikop.

Gikompirmar sa PNP nga gawas sa pagpanulis, nag-atubang og daghang kaso sa Dumaguete City si Okojie  apil na niini ang malicious mischief, estafa, theft ug uban pa ug nalista siya isip Top 9 Most Wanted Person sa regional level.

Ang langyaw gikonsiderar na nga usa ka undocumented alien ug subject sa summary deportation proceedings apan kinahanglan pa niyang atubangon ang iyang mga kaso sa dakbayan sa Dumaguete. (BANAT NEWS)