Acting governor sa Bohol Dionisio Victor Balite, mitaliwan

CEBU, Philippines — Gikompirmar ni suspended Bohol governor Erico Aristotle Aumentado nga mitaliwan na ang acting governor sa Probinsya sa Bohol nga si Dionisio Victor Balite niadtong Miyerkules sa gabii.

Matud pa ni Aumentado nga nitaliwan na ang iyang suod nga higala, elected vice governor sa Bohol ug iyang running mate.

Ang suspended governor mipaambit sa iyang gibati may kalabutan sa kamatayon sa iyang kaabag sa politika.

Dugang pa ni Aumentado, makaguol man ang pagtaliwan sa iyang higala ug partner sa politika pero ang kinabuhi sa tawo lumalabay lang ning kalibutan.

Ang suspended governor nipadayag nga iyang himoon nga inspiration sa padayon nga pagpangalagad sa mga bol-anon ang ilang tandem ni Balite.

Gipadangat usab ni Aumentado ang iyang pahasubo ngadto sa nagbangotan nga pamilya ni Balite.

Ang acting governor anak ni kanhi vice governor Atty. Dionisio Balite.

Ang haya sa acting governor anaa gipahimutang sa may BIT-IC Dao Chapel, Dao Campus, Dao Tagbilaran City, Bohol.

Sa nasayran si Balite nahimong acting governor sukad niadtong buwan sa Mayo ning tuiga dihang gipaubos sa preventive suspension sa Office of the Ombudsman si governor Aumentado subay sa imbestigasyon sa pagtukod sa kontrobersyal nga Captain’s Peak Resort sa Chocolate Hills sa Sagbayan lalawigan sa Bohol. (BANAT NEWS)