Kawani sa Cebu City makadawat og Charter Day bonus
CEBU, Philippines — Makadawat og Charter Day bonus ang mga empleyado sa Cebu City Hall tungod kay ang executive department nag-lobby og supplemental budget alang sa budget appropriation niini ngadto sa konseho sa siyudad.
Kini ang gipahibawo ni Mayor Michael Rama kinsa nangayo og pasaylo ngadto sa dili na mapabilin o dili na ma-renew sa mga kontrata subay sa pagpatuman sa “rightsizing” program atol sa flag raising ceremony kagahapon.
Matud ni Rama nga dili angay masina ang mga dili ma-renew tungod kay makadawat usab sila og bonus.
Si Rama nimando sa Local Finance Committee nga maoy mag-una niini.
“I have always been fighting that employees should enjoy in every celebration because their family deserves to be happy, mao na akoa”, matud ni Rama. Gihangyo ni Rama ang mga empleyado nga pamatud-an nga angayan sila alang sa mga bonus.
Gikataho nga ang pinakabag-o nga budget proposal alang sa paghatag og bonus alang sa mga empleyado sa Cebu City hall gisusi sa konseho sa siyudad ug nagkanayon nga sobra ra kaayo.
Sayo pa, Gisugyot ni Rama nga hatagan og P35,000 isip Christmas bonus ang tanang regular ug casual nga empleyado sa Cebu City hall.
Samtang si Bise Mayor Raymond Alvin Garcia nigama og ordinansa nga mahimong legal nga basehan sa paghatag og gratuity pay nga P10,000 ngadto sa mga job order (JO).
Apan ang konseho sa siyudad nikaltas sa maong bonus diin gikan sa P35 mil alang sa regular ug casual gihimo na lang kini nga P20,000 ug P5,000 sa JO.
Nunot niini, si Konsehal Noel Wenceslao, chairman sa Committee on Budget and Finance nibutyag nga wala pa makaabot sa konseho ang proposal. (BANAT NEWS)
- Latest
