Opisyales sa market sa Cebu City gipasakaan og kasong criminal

CEBU, Philippines — Gipasakaan og reklamong kriminal ang market administrator sa Dakbayan sa Sugbo ug laing opisyales sa merkado ni Byron Garcia,  usa ka importer og isda gumikan sa giingong pagdili kaniya sa pagpahigayon sa iyang negosyo diha sa Pasil Public Market .

Base sa dokumento nga nakuha sa mga sakop sa media, si Garcia nipasaka og kasong kriminal batok kang Robert Barquilla, market administrator ug laing mga empleyado sa market administration nga sila si Ronald Badajos, Eugene Mercado, Raphael Magallon ug Evie Maranga. Ang maong reklamo opisyal kining naduso diha sa Office of the Prosecutor sa Barangay Guadalupe, Dakbayan sa Sugbo niadtong Huwebes, Nobiyembre 16, 2023.

Sa iyang sworn judicial affidavit, si Garcia nagkanayon nga nakabaton siya og alkanse gumikan sa kalapasan sa balaod nga gihimo ni Barquilla ug sa mga nahisgutang opisyales hinungdan sa iyang pagpasaka og reklamo.

Matud ni Garcia nga nagsugod kini dihang gisirad-an ang “Bagsakan sa SRP” ug gibalhin ngadto sa Pasil Public Market ang pagpamaligya og isda.

Si Garcia nipasangil nga gidid-an siya ni Barquilla sa pagbaligya sa iyang mga isda.

“As I have mentioned, I am a trader of local fresh fish and imported frozen fish. These are the products which he prohibits from being sold or traded by me in the Pasil Public Market”, matud ni Garcia.

Gipadayag ni Garcia nga aduna siya’y certification of accreditation isip importer gikan sa Bureau of Customs ug gawas niini aduna usab siya’y permits to sell frozen products lakip na ang business permit nga giisyu sa Office of the City Mayor.     

Sa maong mga dokumento nga nagpalig-on sa iyang kapasidad, gikwestiyon ni Garcia ang pagdili kaniya sa pagpamaligya diha sa Pasil Public Market.

Si Garcia nipasangil nga gi-singled out siya sa ubang mga trader.

“What really prompted me to file this complaint is the annoying, improper, and disturbing manner of prohibiting me to trade in the said market”, ni Garcia pa.

Ug gumikan niini, nipasangil usab si Garcia nga wala gihimong pormal ni Barquilla ang maong pagdili ug nagdumili usab kini sa pagtubag sa iyang tawag alang sa komunikasyon.

“He has not been answering my calls, and none of his men, respondents Ronald Badajos, Eugene Mercado, and Raphael Magallon could explain the grounds for the prohibition. I am actually left confused, distressed, and financially losing”, matud ni Garcia.

Matud usab ni Garcia nga dihang gisirado ang Bagsakan sa SRP wala usab siya hatagi og abiso ni Barquilla hinungdan nga nawagtangan siya og kahigayonan nga maka-bid out alang sa pwesto sa merkado.  Gawas niini, nangangkon usab si Garcia nga si Maranga nihimo og instruction ngadto sa fish brokers nga balibaran siya sa bisan unsang transaksiyon sa fish trading sa Pasil Public Market kay kon dili, dili usab sila tugotan nga makanegosyo.

Ang broker ni Garcia nga si Azucena Zabate, maoy nipahibalo kaniya nga giingong gipahimangnoan siya ni Barquilla nga dili makigtransaksiyon kaniya o sa iyang mga kawani.

Giingong niadtong Nobiyembre 1, 2023 usa sa iyang delivery truck nga gipadala sa public market ang giduol ug giabog sa lugar.

“An employee of the market admin approached my driver, demanded that he leave the premises because I am not allowed to be there. My driver reported this to me, I called my driver and I spoke with the person, whose name was a certain Ronald Badajos”, butyag ni Garcia.

Gibutyag usab ni Garcia nga ang iyang broker personal nga nakigtagbo kang Barquilla niadtong Nobiyembre 6, 2023 ug giingong gihulga nga kon magpadayon kini sa pagbaligya sa mga produkto ni Garcia mapahamtangan kini og silot ug ang mayor’s permit niini dili na i-renew sa Enero 2024.

“As of now I have been deprived of P1,500,000.00 of sales that I would have had from October to November 13,2023”, ni Garcia pa.  — Gikan sa The Freeman, BDB (BANATNEWS)