P900 milyones nakolekta nga buhis sa siyudad sa sugbo

CEBU,  Philippines — Nakakolekta na ang Kagamhanan sa Siyudad sa Sugbo og kapin sa P900 milyones nga real property taxes (RPT) sa unang quarter sa 2023.

Una na nga gitakda sa City Hall ang deadline sa pagbayad sa RPT niadtong Marso 31, 2023.

Sa pakighinabi sa mga tigbalita, gibutyag ni Cebu City Treasurer Mare Vae Reyes nga duna pay pipila ka tag-iya og real property ang wala pa makabayad.

Giawhag niya ang mga tag-iya og real property nga wa pa makabayad sa ilang buhis nga mobayad na aron malikayan ang tukmang silot.

Giklaro hinuon ni Reyes nga mag-agi gyud sila og proseso pinaagi sa pagpadala niini og mga notisya.

Ang koleksyon sa RPT nagikan sa condominium, automated teller machines, telco towers ug uban pa.

Tipik sa RPT mahiadto sa barangay ug sa Special Education Fund.

Samtang nagpahinumdom usab si Reyes ngadto sa katawhan kalabot sa deadline alang sa pagduso sa business tax.

Ang deadline niini karong Abril 20, 2013, ug duna sila’y gi-montar nga processing area diha sa Robinsons Galleria-Cebu. (BANAT NEWS)