Duha ka sunog nagbilin og dul-an P1 milyon nga danyos

CEBU, Philippines —  Moabot sa dul-an sa usa ka milyon ka pesos ang danyos sa sunog nga niulbo sa Dakbayan sa Mandaue ug Cebu City sulod lang sa 24-oras.

Unang sunog nahitabo kagahapon sa kaadlawon diha sa P.C Suico Street, Barangay Tabok, Mandaue City nga naglambigit og usa ka balay nga giingong gipanag-iya ni Janeth Pontanar.

Ang maong sunog giisa lang sa 1st alarm nga nakontrolar dayun. Wala hinuoy naangol o nakalas sa hitabo.

Gipaubos pa hinoon sa imbestigasyon ang hinungdan sa maong sunog nga gipangulohan ni CInsp Arnel Abella, uban sa imbestigador niini. Moabot lang sa P20 mil ang danyos ug usa lang ka one storey residential building ang apektado niini.

Apan sa sunog nga niulbo sa Sitio Little Plaza, Barangay Inayawan, Dakbayan sa Sugbo kagahapon sa buntag gituohan nagsugod sa balay nilang Lorencia “Puring” Quiobe apan nikatap kini sa kabalayan sa mga silingan.

Ang sunog giisa sa 1st alarm alas otso bente tres, nakontrolar alas otso singkwentay uno ug hingpit nga na fire out alas nuybe dos.

Gibana-bana moabot ngadto sa P900 mil ang danyos sa dili mominos sa 18 ka mga panimalay nga hingpit nga naugdaw samtang tulo ang nakan-an sa kalayo.

Matud pa 34 ka mga pamilya ang apektado ang o 199 ka individual.

Ang kabomberohan pinangulohan ni SFO1 Riza Julve, ang imbestigator sa Cebu City mohimo pa og imbestigasyon aron masayran unsay hinungdan sa sunog ug mopatawag pa sila ug dugang mga saksi lakip usab ang tagbalay diin nagsugod pag-ulbo ang kayo.

Samtang sa initial nga talaan sa Department of Social Welfare and Services adunay 28 ka panimalay ang apektado sa pag-ulbo sa sunog, 43 ka pamilya o 154 ka individual apan ipaubos pa kini sa validation. Ang mga nasunogan kasamtangan nga gipahimutang sa Inayawan Sports Complex diin nag apod-apod na ug pagkaon ang city government nga molanat ug tulo ka adlaw.

Ang DSWS nakatala og usa ka Genido Fuentes ang nadala sa tambalanan human kini giingong giatake sa kasingkasing tungod sa sa nahitabo nga sunog. — IBM (BANATNEWS)