Kasamtangang sakop sa board sa MCWD dili mokanaog
Cebu, Philippines — Ang mga kasamtangang sakop sa board sa Metropolitan Cebu Water District ang giingong dili mokanaog sa pwesto.
Base sa ilang argumento giingong dili sila ang “defendants” sa kaso nga gipasaka sa terminated board members batok kang Cebu City Mayor Edgardo Labella ug Local Water Utility Administration (LWUA).
Matud ni Atty. Joey Daluz, kasamtangang chairman sa board sa MCWD nga wala sila’y labot sa kaso busa dili applicable kanila ang Temporary Restraining Order.
Gikatahon nga nakakuha og TRO gikan sa korte niadtong Marso 15, 2021 sila si Ralph Sevilla, Augustus Pe ug Cecilia Adlawan.
Sa maong TRO nga giluwatan ni Regional Trial Court (RTC) Judge James Steward sa Branch 7 gimando nga makabalik na sa ilang mga pwesto si Sevilla, Pe ug Adlawan isip mga sakop sa board sa MCWD.
Ang nahisgutang tulo ka board gipangtangtang kini sa pwesto ni Mayor Edgardo Labella niadtong tuig 2019.
Si Daluz nagkanayon nga lima karon ang kasamtangang sakop sa board ug mamahimo na silang walo human nga gipabalik sa korte sa ilang pwesto ang tulo ka terminated members.
Si Atty. Amando Virgil Ligutan, legal counsel nila ni Sevilla, Pe ug Adlawan nihatag dayon og tubag sa argumento ni Daluz.
Matud ni Ligutan nga ang TRO nag-cover sa kasamtangang board ug nahisgotan kini atol sa hearing.
Gisugyot ni Ligutan sa kampo ni Daluz nga motambong sa mga hearing aron masayod kini sa dagan sa kaso. (BANAT NEWS)
- Latest
