Labing unang higayon wa kaabot 50 ang nadugang nga positibo

CEBU, Philippines — Ang Cebu City Health Department (CCHD) nakatala og 48 ka bag-ong na positibo sa novel coronavirus disease kagahapong adlawa, labing unang higayon nga wala kaabot og 50 ka kaso ang natala sa usa ka adlaw sugod nga gibalik ang siyudad sa enhanced community quarantine gikan sa general community quarantine niadtong Hunyo 16.

Ang narekord nga mga bag-ong kaso gikan sa Barangay Lahug, lima; Barangay Talamban, lima; Barangay Tisa, lima; ug Barangay Mabolo, upat. Ang uban pang mga kaso gikan sa Camputhaw, Cogon Pardo, ug Labangon nga adunay tulo nga kaso matag usa.

Samtang ang Barangays Apas, Buhisan, Pahina Central, ug Punta Princesa adunay nadugang nga tagduha  ka mga kaso.

Sa pikas bahin, ang barangays Basak Pardo, Capitol, Duljo, Inayawan, Mambaling, Pardo, Parian, Pit-os, Sambag 2, Suba, T. Padilla, ug Tinago nakatala og tagsa (1) ka kaso.

Tungod niini, miabot na og 4,412 ang mga kaso sa siyudad gikan nagsugod ang pandemiya dinhi sa siyudad, apan 2,227 lang ang aktibo niini sanglit ang uban nangaayo na.

Samtang nakatala sab ang siyudad og dugang walo (8) ka mga namatay kagahapong adlawa ug miabot na tanan karon og 81 ang tanang nakabsan og kinabuhi sa siyudad.

Matud pa sa CCHD, ang mga nangamatay (apil ang petsa kun kanus-a sila nakalas) nagagikan sa Barangay Basak San Nicolas, usa (6/14/20); Barangay Camputhaw, usa (6/9/20); Barangay Hipodromo, usa (6/11/20); Barangay Inayawan, usa (6/16/20); Barangay Lahug, usa (6/10/20); Barangay Tisa, usa (6/11/20); ug Barangay Mambaling, duha ang namatay (5/19/20) ug (5/29/20).

Gipahibalo sab sa CCHD nga adunay 12 ka mga bag-ong recovery kagahapon, nagdala sa kinatibuk-ang gidaghanon sa mga naulian sa 2,104. Ang mga pasyenteng nangaayo taga Barangay Labangon 11 ug usa gikan sa Barangay Tisa.  Niadtong Biyernes, 34 nga na-recover nga mga pasyente ang nakagawas gikan sa Cebu City Quarantine Center (CCQC).

Duha sa mga pasyente nga nag-edad 82 ug 83 ang lakip sa 34 nga mga pasyente nga gitambalan sa Cebu City Quarantine Center (CCQC) kay para sa mild ug moderate na sintomas. Gidumala kini sa Cebu City Medical Center.

Ang uban pang mga pasilidad sa dakbayan nga mahimong dad-on sa mga magpositibong dunay mga sintomas mao ang Bayanihan Cebu Field Center (BCFC) sa karaan nga Sacred Heart School, ug pasilidad sa quarantine sa International Eucharistic Congress (IEC) Convention Center nga pulos gikonsiderar nga level II facilities. /IBM (BANATNEWS)