Daghang buot mokuha og ‘Clean Rider’ sticker sa Talisay

CEBU, Philippines – Daghan na ang niduol sa kapolisan sa Siyudad sa Talisay ug nangutana labot sa pagkuha sa sticker sa motorsiklo nga malakip na sa ‘Clean Rider’.

Si Inspector Rene Cerna, deputy chief sa Talisay City Police nagkanayon nga ubay-ubay na ang mga motorista nga nangutana kanila sa ilang angayang buhaton nga makakuha sa maong nga sticker.

Ang mga mo-apply aron makakuha sa sticker kinahanglang mobisita kini diha sa Police Station aron mo-fill up og porma ug makahibalo usab sila sa  mga rekisitos nga gikinahanglan.

Ang clean rider nga programa sa kapolisan gilusad niadtong Agosto 1, niining tuiga aron dali nga mailhan ang mga dautang elemento nga gamiton ang mga motorsiklo sa ilang ilegal nga kalihukan.

Ang mga mahatagan sa sticker sa Clean Rider pasabot nga limpiyo o wala nalambigit sa ilegal nga kalihukan ang maong nagmaneho sa motorsiklo.

Matud ni Cerna nga dako kini nga tabang dili lang sa kapolisan lakip na sa tanang indibiduwal aron magpanagana ang mga dautang elemento sa katilingban nga mobuhat og krimen. (/BDB)(BANAT NEWS)