Lalaki gitabangan og kulata sa fans ni Pacquiao diha sa coliseum
CEBU, Philippines - Ang eksenang sinumbagay ug binunalay og bangko maoy nakapuhunong sa pagmaya sa mga Sugbuanon nga misaksi ug nalipay sa kadaugan ni Pambansang Kamao Manny “Pacman†Pacquiao batok kang Timothy Bradley kagahapon sa Cebu Coliseum.
Nagubot ang mga tawo nga nanan-aw dihang kalit nga napalong ang pay-per-view nga gitan-aw human gianunsyo nga midaog si Pacquiao batok kang Bradley via unanimous decision.
Giila ang nakulatahan mao si Ferdinand Douzo kinsa daling gitabang sa mga security personnel aron mapugngan ang mga tawo pagkulata kaniya.
Sa pakighinabi sa mga tigbalita si Douzo miingon nga kalit lang siya nga gibunalan ug wa siya masayod kun unsay hinungdan gani nanganti pa kini sa tawong nagbunal kaniya. “Nahibulong ko iya ko gibunalan, iya kung gibunalan, wa ko kahibawo, ako to pangitaon di to mabuhi sa kalibutan,†asoy ni Douzo.
Apan lahi ang gibutyag ni Danny Reynes, usa sa mga gwardiya sa coliseum kay matod niya kalit giibot ni Douzo ang cable box hinungdan nga nasuko ang mga tawo. Gidugang ni Reynes nga gawas sa cable box naigo usab ang projector maong napalong kini ug wa na makita sa mga tawo ang interbyu kang Pacquiao.
Nasayran nga gidala sa Carbon Police Station si Douzo alang sa “safekeeping†ug gipahiling usab kini sa Cebu City Medical Center aron pagsusi kun aduna kini bun-og, wa usab maklaro kun gipa-liquor test kun nakainom ba kini. Gibuhian ra usab nila ang maong lalaki ug giturn-over sa iyang asawa tungod kay wala may reklamante.
Matud sa asawa nga di hinginom ang iyang bana apan base sa mga pamahayag sa mga tawo sa Cebu Coliseum giingong nagmaoy kini.
Gawas sa maong kagubot, wa nay lain pang nadawat nga alarma ang Cebu City Police Office operations section, samtang ang radio operator sa police hotline 166 sa Mobile Patrol Group nga si Angelo Sambo miingon nga wa gyu’y alarma silang nadawat atol sa sangka ni Pacquiao. (BANAT NEWS)
- Latest
